Yaxın Şərqdə münaqişənin kəskinləşməsi və enerji daşıyıcılarının bahalaşması fonunda Avropada yeni enerji böhranı riski yaranıb. Bu barədə “Financial Times” qəzeti məlumat yayıb.
Nəşrin məlumatına görə, İsrail, ABŞ və İran arasındakı münaqişə Avropada qaz qiymətlərinin 2023-cü ildən bəri ən yüksək səviyyəyə çatmasına səbəb olub. Fevralın 27-dən etibarən bu göstərici 53% artıb. FT qeyd edir ki, buna Hörmüz boğazında gəmi hərəkətinin dayandırılması və Qətərdə mayeləşdirilmiş təbii qaz (LNG) istehsalının azalması təsir edib. Qəzet həmçinin Fransaya LNG daşımalı olan tanker haqqında da xatırladıb — gəmi marşrutunu dəyişərək Asiyaya yönəlib. Müəlliflərin fikrincə, bu, enerji tədarükləri uğrunda rəqabətin gücləndiyini göstərir.
FT-nin qeydinə görə, hazırda Avropa İttifaqı ölkələrinin enerji ehtiyatı anbarları 30%-dən az doludur. Eyni zamanda, blok LNG tələbatının təxminən 10%-ni Qətərdən idxal edir. Digər ölkələrdən tədarüklər uğrunda rəqabətin artması qiymətlərin daha da yüksəlməsinə gətirib çıxara bilər ki, bu da iqtisadi artımı ləngidə bilər. Belə vəziyyət xüsusilə LNG idxalından daha çox asılı olan İtaliya və Almaniyaya təsir edə bilər.
Martın 3-də analitiklər də Yaxın Şərqdə münaqişənin kəskinləşməsi və Hörmüz boğazının faktiki blokadası fonunda Çin, Avropa İttifaqı və Hindistan üçün risklər barədə xəbərdarlıq ediblər. Həmin vaxt Brent markalı neftin qiyməti bir barel üçün $85-ə yüksəlmişdi. Analitiklərin sözlərinə görə, hərbi əməliyyatların dördüncü günündə boğazdakı vəziyyət qeyri-müəyyən olaraq qalır və gəmiçilik sıxlığı xeyli azalıb.
