S&P Global-ın Commodities at Sea hesabatına (8 aprel) görə, ABŞ və İran arasında şərti atəşkəs razılaşmasından sonra gələn həftə ərzində Hörmüz boğazından keçən gəmi trafiki yanvar–fevral aylarındakı müharibəöncəsi səviyyənin 25%-nə qədər arta bilər. Müharibə başlayandan bəri bu göstərici təxminən 10% idi.
Hazırda Hörmüz boğazında olan və neft, kimyəvi maddələr, neft məhsulları və mayeləşdirilmiş qaz daşıyan təxminən 500 gəminin əksəriyyəti ikinci həftənin sonuna — yəni 24 aprelə qədər boğazı tərk edə bilər. Hesabata görə, iki həftə ərzində — 22 aprelə qədər — trafik intensivliyi müharibəöncəsi səviyyənin 50%-nə çata bilər.
“Həmçinin ehtimal olunur ki, limandan çıxan gəmilərə üstünlük veriləcək və enerji təchizatı ilə bağlı gəmilər növbənin əvvəlində olacaq”, — hesabatda qeyd olunur. “Əgər trafik yaxın perspektivdə müharibəöncəsi səviyyənin 10%-ində qalarsa, gəmilərin əksəriyyətinin limanı tərk etməsi bir aydan çox çəkəcək və onlar 10 maya qədər çıxışı başa vurmalı olacaqlar”.
Atəşkəs dövründə gəmilər üçün əlavə tələblər — məsələn, yoxlamalar və ya hərbi dəniz müşayiəti — tətbiq oluna bilər ki, bu da trafiki daha da məhdudlaşdıra bilər.
“Qısamüddətli perspektivdə bazar əhvalının yaxşılaşmasının əsas göstəricilərinə müharibə başlayandan bəri ilk dəfə yüklənmiş LNG tankerinin çıxışı, həmçinin İranla bağlı olmayan gəmilərin Yaxın Şərqdə Fars körfəzi istiqamətində tranzitinin sabit artımı daxildir”.
7 aprel tarixinə Hörmüz boğazından ümumilikdə 12 gəmi keçib ki, bu da əvvəlki günlə müqayisədə çoxdur. Bu gəmilər arasında dörd quru yük gəmisi (bulk carrier), üç kimyəvi/neft məhsulları tankeri, üç LNG tankeri və iki konteyner gəmisi olub. Onların yarısı Fars körfəzinə daxil olurdu, digər yarısı isə oradan çıxırdı. 6 aprel tarixində boğazdan keçən doqquz gəminin hamısı əks istiqamətdə hərəkət edirdi.
Son dövrlərdə uğurlu tranzitlərin əksəriyyəti İran sahillərinə daha yaxın yerləşən şimal marşrutu ilə — Keşm və Larak adaları arasından həyata keçirilib.
