“Goldman Sachs” 2023-cü ilin ikinci yarısında neft bazarında rekord tələbin olacağını gözləyir ki, bu da “Brent” markalı neftin qiymətinin bir barel üçün 86 dollara qədər artmasına səbəb olacaq.
Banker.az bu barədə Vedomosti-yə istinadən xəbər verir.
“Biz ilin ikinci yarısında kifayət qədər böyük kəsir gözləyirik, üçüncü rübdə tələbat yüksələcəyi üçün gündə təxminən 2 milyon barelə çatacaq”, – mesajda deyilir.
Bankın proqnozuna görə, ilin sonuna kimi “Brent” markalı neft 80 dollardan 86 dollara yüksələcək. London Fond Birjasının ICE-nin Moskva vaxtı ilə saat 13:16-ya olan məlumatına görə, bu markanın bir barelinin qiyməti 81.7 dollar təşkil edib.
Bankın rəhbəri Daan Struven bildirib ki, ABŞ-ın xam neft hasilatı son bir ildə əhəmiyyətli dərəcədə artaraq gündə 12.7 milyon barrelə çatıb. Ekspert əlavə edib ki, bu ilin qalan dövründə artım templəri yavaşlayacaq.
Eyni zamanda, ABŞ-da neft qazma qurğularının sayı son 16 ayda ən aşağı səviyyəyə çatıb. “Goldman Sachs” son hesabatında bildirib ki, onların sayı 2022-ci ilin sonundakı pik nöqtəsindən 15% azalıb.
Struven təklif edib ki, G20 enerji nazirlərinin görüşündən sonra razılaşmanın olmaması uzunmüddətli neft tələbi ilə bağlı “çox əhəmiyyətli” qeyri-müəyyənliyə işarə edir.
Həftə sonu Hindistanda keçirilən enerji nazirlərinin görüşündə bir neçə G20 ölkəsi təmiz enerjiyə keçidi çətinləşdirən qalıq yanacaqların (kömür, neft, qaz) mərhələli şəkildə dayandırılmasına razılıq verməyib.
Beynəlxalq Enerji Agentliyi iyun ayında 2023-cü ildə qlobal neft tələbatının sutkada 2.4 milyon barel artacağını proqnozlaşdırmışdı ki, bu da əvvəlki proqnozu üstələyir.
