“Ekstremal” ssenarilər baş verdiyi halda — ticarət müharibəsinin dərinləşməsi və təchizatın artması fonunda — Brent markalı neftin qiyməti bir barel üçün 40 dollardan da aşağı düşə bilər.
Banker.az xəbər verir ki, bunu “Goldman Sachs Group Inc.”, bir həftə ərzində neft üzrə proqnozlarını iki dəfə aşağı saldıqdan sonra bildirib. Amma bank bunu az ehtimal olunan ssenari kimi görür.
“Qlobal ÜDM-in azalması və OPEC+ hasilat ixtisarlarının tam ləğv olunduğu, bunun da qeyri-OPEC təchizatına təzyiq göstərdiyi daha ekstremal və az ehtimal olunan ssenaridə, 2026-cı ilin sonlarında Brent neftinin qiymətinin 40 dollardan bir qədər aşağı düşəcəyini proqnozlaşdırırıq,” — deyə, analitik Yuliya Qriqsbi və onun həmkarları 7 aprel tarixli qeyddə bildiriblər. Bununla belə, bu proqnoz bankın əsas baza ssenarisi deyil — əsas proqnoza görə Brent gələn ilin dekabrında 55 dollar səviyyəsində olacaq.
Son ticarət sessiyalarında qlobal neft bazarı kəskin dəyişikliklərlə üzləşib. Tramp administrasiyasının ticarət müharibəsini daha da alovlandırması və Çin kimi bəzi iqtisadiyyatların buna qarşı çıxması enerji istehlakı üçün resessiya risklərini artırıb. Eyni zamanda, uzunmüddətli hasilat məhdudiyyətlərindən sonra OPEC+ gözləniləndən daha çox neft bazara çıxarmağa başlayıb.
Bu fon qarşısında “Goldman Sachs”, “Morgan Stanley” və “Societe Generale SA” kimi banklar öz baza ssenarilərini aşağı salıblar və həm az ehtimal olunan mənfi, həm də müsbət ssenariləri nəzərdən keçirirlər. Bu, əmtəə bazarını izləyən analitiklər üçün fərqli şərtlər altında mümkün vəziyyətləri qiymətləndirməkdə adi təcrübədir.
“Goldman” analitiklərinin “Neft qiymətləri nə qədər düşə bilər?” adlı hesabatında qeyd olunur ki, əgər “tipik” bir ABŞ resessiyası və mövcud təchizat səviyyələri nəzərə alınsa, Brent bu ilin dekabrında 58 dollar, gələn ilin həmin ayında isə 50 dollar səviyyəsində ola bilər.
Hazırda Brent markalı neftin qiyməti 63.90 dollar səviyyəsindədir. Bu isə bazar ertəsi günü son dörd ilin ən aşağı səviyyəsinə düşdükdən sonra müşahidə olunub.
