Goranboy rayonu, G.Civəzadə küçəsində yerləşən, fiziki şəxs Şahin Şamil oğlu Qarayevə məxsus “Şahin” restoranında aparılan yoxlama zamanı restorana gələn müştərilərin istifadəsi üçün nəzərdə tutulmuş aşkar saxtalaşdırma əlamətləri olan 4 ədəd 1 litrlik, 3 ədəd 0.7 litrlik və 2 ədəd 0.5 litrlik “Organic Line” əmtəə nişanlı, 2 ədəd 1 litrlik, 8 ədəd 0.7 litrlik və 4 ədəd 0.5 litrlik “Banketnaya Yubiley 10” əmtəə nişanlı və 2 ədəd 1 litrlik, 3 ədəd 0.7 litrlik “Хортиця” əmtəə nişanlı alkoqollu içki aşkar edilib. Qida Təhlükəsizliyi Agentliyindən verilən məlumata əsasən, malların orjinaldan kəskin fərqləndiyi, o cümlədən qanunsuz olaraq təkrar spirtli içkilərin butulkalarından istifadə edildiyi və digər hissələrin kustar üsulla hazırlanaraq bərkidildiyi müəyyən olunub.
Banker.az Agentliyə istinadən xəbər verir ki, aşkar edilmiş faktla bağlı dərhal alkoqollu içkilərin realizasiyası dayandırılıb və məhsullar möhürlənərək saxlanca verilib.
Müayinələrin aparılması üçün məhsullardan nümunələr götürülərək Azərbaycan Qida Təhlükəsizliyi İnstitutunun müvafiq laboratoriyasına təqdim olunub.
Araşdırmalar davam etdirilir.
