Gürcüstan Qazaxıstanla əlavə neft və neft məhsularının nəqli ilə bağlı fəal danışıqlar aparır.
Bu barədə Gürcüstanın iqtisadiyyat və dayanıqlı inkişaf nazirinin müavini Quram Quramişvili bildirib.
Onun sözlərinə görə, 2022-2023-cü illərdə Batumi neft terminalı vasitəsilə təxminən 2 milyon ton Qazaxıstanın neft və neft məhsullarının nəqli planlaşdırılıb.
Nazir müavini həmçinin qeyd edib ki, “Gürcüstan Dəmir Yolları” SC “orta dəhliz”ə quru yüklərin cəlb olunması üzrə fəal iş aparır:
“Bu ilin yanvar-fevral aylarında beynəlxalq dəmir yolu nəqliyyatı ilə daşınmış yüklərin həcmi 1,8 milyon ton təşkil edib ki, bu da illik müqayisədə 10,7 % çoxdur. Hesabat dövründə Bakı-Tbilisi-Qars dəmir yolu ilə daşınan (Qardabani-Axalkalaki və geri) TEU tipli konteynerlərin sayı 4 074 ədəd təşkil edib. Bu, ötən ilin eyni göstəricisindən 78,2 % çoxdur”, – deyə Q.Quramişvili qeyd edib.
