30 C
Baku
Sunday, July 14, 2024

Hacıqabul Sənaye Məhəlləsində yeni müəssisə açıldı – İnvestisiya dəyəri ₼18 mln.-dan çoxdur

Bu gün İqtisadiyyat Nazirliyinin İqtisadi Zonaların İnkişafı Agentliyinin (İZİA) tabeliyində olan Hacıqabul Sənaye Məhəlləsində “Penoplex Prikavkazye” MMC-nin istilik izolyasiya lövhələrinin istehsalı müəssisəsinin açılış mərasimi keçirilib.

Bu barədə İZİA-dan bildirilib.

Məlumata görə, innovativ texnologiya əsasında müəssisədə istilik izolyasiya lövhələrinin istehsalı həyata keçirilir və istehsal prosesində xammal kimi ümumi təyinatlı polistiroldan istifadə edilir. 100% Rusiya kapitalı olan müəssisənin investisiya dəyəri 18.4 milyon manat təşkil edir.

İllik istehsal gücü 100 min molan müəssisədə istehsal olunan məhsulların 60%-nin daxili bazara, 40%-nin isə xarici bazara satılması planlaşdırılır.

Sənaye Məhəlləsinin 6.7 hektar ərazisində inşa edilmiş müəssisə dövlət vəsaiti hesabına hazır infrastrukturla (qaz, işıq, su, kanalizasiya, yol) təmin olunub.

Qeyd edək ki, Hacıqabul Sənaye Məhəlləsi mikro, kiçik və orta sahibkarların fəaliyyətinin dəstəklənməsi, qeyri-neft sektorunun davamlı inkişafının təmin edilməsi, əhalinin istehsal sahəsində məşğulluğunun artırılması məqsədilə dövlət başçısının 2017-ci il 25 iyul tarixli Sərəncamı ilə yaradılıb. 200 nəfərdən çox insanın daimi işlə təmin edildiyi Sənaye Məhəlləsində ümumi investisiya həcmi 163 milyon manatdan çox olan 14 sahibkarlıq subyekti rezident kimi qeydiyyatdan keçib və bunlardan 8-i artıq fəaliyyətə başlayıb. Mövcud layihələr üzrə əlavə olaraq Sənaye Məhəlləsinə 120 milyon manata yaxın investisiyanın yatırılması, 1 500-dən artıq iş yerinin yaradılması nəzərdə tutulur.

2023-cü ilin 9 ayında Hacıqabul Sənaye Məhəlləsində 51 milyon manata yaxın məhsul istehsal edilib ki, bu da əvvəlki ilin eyni dövrü ilə müqayisədə 97% artım (2022-ci ilin 9 ayında 25.8 milyon manatlıq məhsul istehsal edilib) deməkdir.

İndiyədək Sənaye Məhəlləsinin rezidentləri tərəfindən 95 milyon manata yaxın məhsul istehsal olunub ki, bunun da 1 milyon manatlıq hissəsi ixracın payına düşür.

MənbəReport
Son xəbərlər
Digər xəbərlər