“Corendon Airlines” aviaşirkəti Avropada ilk olaraq “uşaqsız zona”ların olduğu uçuşlara başlayıb, bu barədə “Bloomberg” yazır. Məlumata görə, belə zonada oturmaq imkanı üçün sərnişinlər $50-dan $100-a qədər əlavə ödəniş etməli olacaqlar.
Hələki uşaqlardan azad zonalar bir marşrut üzrə – Amsterdamla Karib dənizindəki Kurakao adası arasında uçuşlar üçün mövcuddur.
“Təyyarənin bu sahəsi uşaqsız səyahət edən sərnişinlər və rahat şəraitdə işləmək istəyən işgüzar səyahətçilər üçün nəzərdə tutulub”, – şirkət açıqlama verib. Yenilik valideynlər üçün də sərfəli olacaq, çünki onlar övladlarının başqa insanlara mane olub-olmamasından daha az narahat olacaqlar.
Uşaqlardan azad zonaya Airbus A350-900 təyyarəsinin ilk 12 sırası, yəni pərdə ilə digər sərnişinlərdən ayrılmış 93 standart oturacaq və doqquz XL oturacaq daxil olacaq. İlk uçuş noyabrın əvvəlində baş tutacaq.
