Azərbaycanın avtonəqliyyat vasitəsi sahiblərinin mülki məsuliyyətinin icbari sığortası və ya icbari avto-sığorta üzrə 2025-ci ilin yanvar-fevral aylarında sığorta şirkətləri tərəfindən 25 milyon 70 min manat sığorta haqqı toplanıb, sığorta ödənişləri isə 19 milyon 830 min manat təşkil edib. Beləliklə, zərərlilik əmsalı (loss ratio) 79% səviyyəsinə yüksəlib.
Banker.az bu barədə Mərkəzi Bankın təqdim etdiyi rəqəmlərə istinadən xəbər verir.
Ötən ilin eyni dövründə bu göstəricilər 24 milyon 493 min manat və 16 milyon 750 min manat idi və zərərlilik əmsalı 68% təşkil edirdi. Bu isə o deməkdir ki, 2025-ci ildə sığorta ödənişlərinin toplanan haqlara nisbəti kəskin artıb.
İcbari avtomobil sığortasında zərərlilik əmsalının 80%-ə yaxınlaşması sığorta şirkətləri üçün ciddi siqnal hesab olunur. Bu, ödənişlərin sığorta yığımlarına nisbətən daha sürətlə artdığını göstərir ki, bu da gəlirliliyin azalmasına gətirib çıxara bilər.
Beynəlxalq standartda bu nisbətin 60-70% aralığında – normal, 70-80% aralığında – riskli zona, 80%-dən yuxarı – ciddi siqnal hesab edilir.
2024-cü il ərzində zərərlilik əmsalı aylar üzrə artaraq yanvarda 64.4%-dən dekabrda 77.5%-ə yüksəlib. 2025-ci ilin ilk iki ayında isə bu göstərici yanvarda 74%, fevralda 79% olub.
Qeyd edək ki, Azərbaycan Sığortaçılar Assosiasiyası keçən ay Azərbaycanın sığorta şirkətləri fevralın sonu – martın əvvəlində qeydə alınmış qarlı hava şəraitində baş vermiş sığorta hadisələrinə görə 3 milyon manata yaxın ödəniş etməyi planlaşdırır.
