Azərbaycanda yeni kommersiya qurumlarının qeydiyyatında azalma müşahidə olunur. 2026-cı ilin yanvar–may aylarında 5 214 kommersiya qurumu dövlət qeydiyyatından keçib. Bu göstərici ötən ilin eyni dövründə qeydə alınmış 6 236 kommersiya qurumu ilə müqayisədə 16.4% azdır.
Banker.az bu barədə Dövlət Vergi Xidmətinə istinadən xəbər verir.
May ayında dövlət qeydiyyatından keçən kommersiya qurumlarının sayı 910 olub. Onların 88.2%-i yerli, 11.8%-i isə xarici investisiyalı şirkətlərdir. Xarici investisiyalı qurumların payı ötən ilin müvafiq dövründəki 10.9%-dən 11.8%-ə yüksəlib.
2026-cı il iyunun 1-nə ölkədə uçotda olan vergi ödəyicilərinin sayı 1 709 921-ə çatıb. Onların 86.8%-i fiziki şəxslər, 13.2%-i isə hüquqi şəxslər və digər təşkilatlardır. İllik müqayisədə vergi ödəyicilərinin ümumi sayı 5.2%, fiziki şəxslərin sayı 5.1%, hüquqi şəxslərin sayı isə 5.9% artıb.
Hesabat dövrünün sonunda qeydiyyatda olan kommersiya qurumlarının sayı 209 205 təşkil edib. Yeni qeydiyyatdan keçən kommersiya qurumlarının 84.3%-i elektron qaydada qeydiyyata alınıb. Yanvar–may aylarında qeydiyyatdan keçmiş yerli investisiyalı MMC-lərin 97.1%-i elektron qeydiyyatdan keçib.
İyunun 1-nə dövlət qeydiyyatında olan kommersiya hüquqi şəxslərinin 92.2%-i MMC formasında fəaliyyət göstərib.
