Yüksək faiz dərəcələri və COVID-19 pandemiyası dövründə şirkətlərə verilən genişmiqyaslı dövlət yardımının dayandırılması inkişaf etmiş iqtisadiyyatı olan əksər dövlətlərdə biznesə ağır zərbə vurub və bu da müflisləşmələrin ikirəqəmli artım tempinə səbəb olub.
Sentyabrın 30-da başa çatan maliyyə ili üzrə ABŞ-da korporativ iflasların sayı əvvəlki ilin analoji dövrü ilə müqayisədə 30 faiz artıb.
İqtisadiyyatı Avropada ən böyük olan Almaniyada yanvar-sentyabr aylarında müflisləşmiş şirkətlərin sayı 25 faiz artıb. İyundan bəri hər ay ikirəqəmli artım tempi qeydə alınır.
Avropa İqtisadiyyatının Dövlət Statistika İdarəsinin məlumatına əsasən, icma ölkələrində müflis şirkətlərin sayı yanvar-sentyabr aylarında 13 faiz artaraq səkkiz ildə ən yüksək həddə çatıb. Fransa, Hollandiya və Yaponiyada oktyabr ayında iflas hallarının sayı illik müqayisədə 30 faizdən çox artıb. İngiltərə və Uelsdə yanvar-sentyabr aylarında müflisləşmə səviyyəsi 2009-cu ildən bəri ən yüksək həddə olub.
İqtisadi Əməkdaşlıq və İnkişaf Təşkilatı bu yaxınlarda Şimali Avropa Danimarka, İsveç və Finlandiya da daxil olmaqla, bir sıra dövlətlərdə korporativ müflisləşmələrin sayının 2008-2009-cu illərdəki qlobal maliyyə böhranı səviyyələrini aşdığını bildirib.
“Capital Economics”in baş iqtisadçısı Nil Şirinq deyib ki, əsas mənfi amillər borc xidmətinin dəyəri və pandemiya dəstəyinin ləğvi və xüsusilə enerji tələb edən sektorlarda yüksək enerji xərcləridir.
Analitiklərin sözlərinə görə, ən çox müflisləşmə nəqliyyat sənayesində və otel biznesində qeydə alınıb.
Şirinq şirkətlərin ödəniş qabiliyyətinin azalması tendensiyasının davam edəcəyi ilə bağlı xəbərdarlıq edib, çünki bir çox müəssisə yaxın aylarda daha yüksək faizlə borc üçün yenidən kredit maliyyələşdirməsi almalı olacaq.
Ekspertlər hesab edirlər ki, müflisləşmə hallarının artması yaxın bir neçə ildə qlobal iqtisadi fəaliyyətə və iş yerlərinin artmasına mənfi təsir göstərəcək.
“Moody’s” beynəlxalq reytinq agentliyi 2024-cü ilin oktyabr ayında son illərin orta həddini keçdikdən sonra dünyada spekulyativ reytinqli şirkətlərin defolt sayının artmağa davam edəcəyini gözləyir.
Almaniyanın “Allianz” sığorta şirkəti qlobal müflisləşmə üzrə artım tempinin gələn il 2023-cü ildəki 6 faizlik templə müqayisədə 10 faizə çatacağını proqnozlaşdırır. Şirkətin bildirdiyinə görə, ən çox otel biznesi, nəqliyyat və pərakəndə satış sahələri zərər görəcək.
