İpotekaya xitam verilən hallar genişlənir.
Bu, Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında müzakirəyə çıxarılan “İpoteka haqqında” qanuna təklif edilən dəyişiklikdə əksini tapıb.
Layihəyə əsasən, ipoteka saxlayan tələbdən və ya ipotekadan imtina etdikdə ipotekaya xitam veriləcək.
Qeyd edək ki, hazırda ipotekaya aşağıdakı hallarda xitam verilir:
– ipoteka saxlayan və ipoteka qoyan bu barədə razılığa gəldikdə;
– əsas öhdəliyə xitam verildikdə;
– tutmanın yönəldilməsi nəticəsində ipoteka predmeti satıldıqda;
– ipoteka predmeti məhv olduqda;
– bu Qanunla nəzərdə tutulmuş digər hallarda.
Bu Qanunda nəzərdə tutulmuş hallarda ipoteka saxlayan ipotekaya xitam verildiyi gündən 5 təqvim günü ərzində bu barədə ipotekanın qeydiyyatını aparan dövlət orqanına ərizə ilə müraciət etməlidir. Ərizənin verilməməsi nəticəsində ipoteka qoyana vurulan zərərə görə ipoteka saxlayan məsuliyyət daşıyır.
