ABŞ-lı iqtisadçılar Demokrat partiyasının namizədi Hillary Clintonun ölkə iqtisadiyyatı üçün daha yaxşı prezident olduğunu düşünür. Respublikaçı namizəd Donald Trump isə iqtisadçıların dəstəklədiyi namizəd olaraq üçüncü yerdədir.
ABŞ -ın iqtisadiyyat sahəsindəki ən böyük cəmiyyətlərindən olan Milli İş Dünyası İqtisadçıları Birliyi (NABE) öz 414 üzvü ilə İqtisadi Siyasətlər Sorğusu keçirib və indi nəticələrini açıqlayıb.
Sorğuda iqtisadçılara “Hansı namizəd ölkə iqtisadiyyatını ən yaxşı idarə edə bilər”? sualı da verilib.
20 İyul – 2 Avqust tarixlərində keçirilmiş sorğuya qatılan 414 iqtisadçının 55%-i Hillary Clinton, 15%-i Gary Johnson və 14%-i Donald Trump cavabını verib, qalanı isə ya cavab verməyib ya da başqa namizədləri göstəriblər.
NABE-nin sorğusunda ABŞ Mərkəzi Bankı Fedin pul siyasətinə dair suallara da yer verilib.
İştirakçı iqtisadçıların 51%-i mövcud pul siyasətini qəbul edərək Fedin doğru yolda olduğu fikirindədir. Bu, mart ayında keçirilən əvvəlki sorğuda 56 faiz səviyyəsində idi.
Mənbə: Azadlıq Radiosu
