“Reuters”in sorğusuna qatılan əksər iqtisadçıların fikrincə, qlobal iqtisadiyyatın bu il tənəzzülə doğru irəliləməsi riski yüksəkdir. Onların 60%-i (167 nəfərdən 101-i) 2025-ci ildə qlobal tənəzzül riskini yüksək və ya çox yüksək adlandırıb. Altmış iki iqtisadçı belə bir tənəzzül riskinin aşağı, dördü isə çox aşağı olduğuna inanır.
Aprelin 1-dən 28-dək sorğuda iştirak edən 300-dən çox iqtisadçıdan heç biri tariflərin biznes əhval-ruhiyyəsinə müsbət təsir etdiyini deməyib. Respondentlərin 92%-i bunu “mənfi” adlandırıb. Və yalnız 8% (əsasən Hindistandan və inkişaf etməkdə olan iqtisadiyyatlardan olan iqtisadçılar) “neytral” adlandırıb.
İqtisadçıların dörddə üçü 2025-ci ildə qlobal ÜDM-in artımı ilə bağlı proqnozlarını yanvar sorğusunda 3,0%-dən 2,7%-ə endiriblər (BVF qlobal iqtisadi artımı 2,8% proqnozlaşdırır). Yanvar ayı sorğusu ilə müqayisədə 48 ölkədən 28-də ÜDM üzrə median artım proqnozları aşağıya doğru yenidən nəzərdən keçirilib. İqtisadçılar hesab edirlər ki, Meksika iqtisadiyyatı cəmi 0,2%, Kanada iqtisadiyyatı 1,2% artacaq.
10 ölkə üçün konsensus proqnozu dəyişməz qalıb. O cümlədən, iqtisadiyyatların müvafiq olaraq 4,5% və 1,7% artacağını gözlədikləri Çin və Rusiya üçün bu göstəricidə ABŞ-ni qabaqlayır. Argentina və İspaniya da daxil olmaqla, daha 10 ölkə üçün əsasən daxili proseslərlə bağlı proqnoz bir qədər yüksəldilib.
Xatırladaq ki, aprelin 9-da Donald Tramp 185 ölkəyə idxal rüsumları tətbiq edib. Ən böyük tariflər Çinə qarşı olub və 145% təşkil edib.
Cənab Tramp əvvəllər demişdi ki, onun tətbiq etdiyi tariflər hər gün ölkəyə 2 milyard dollar gəlir gətirir. Onun sözlərinə görə, 70-dən çox ölkə Vaşinqtonla tariflərlə bağlı danışıqlara hazırdır.
Daha sonra Tramp ritorikasını yumşaldaraq, Çinə qarşı “çox mehriban” və “nəzakətli” olacağını vəd edib və yekun tariflərin indiki 145%-dən aşağı olacağını proqnozlaşdırıb.
