İqtisadiyyat naziri Şahin Mustafayev Diqlas” ticarət mərkəzində yanğın nəticəsində zərər çəkmiş sahibkarlara maddi yardım göstərilməsi qaydalarını təsdiq edib.
Aprelin 4-dən qüvvəyə minən qaydalara əsasən, ticarət mərkəzində mağaza, həmçinin anbar icarəyə götürən sahibkarlara 10 min manat məbləğində maddi yardım ayrılacaq.
Ticarət mərkzində rəfləri və ticarət obyektləri olan sahibkarlara 2 min manat məbləğində maddi yardım ayrılacaq.
Ödənişlər Kiçik və Orta Biznesin İnkişafı Agentliyi (KOBİA) tərəfindən həyata keçiriləcək. Şərtlərə əsasən, Agentlik 5 gün ərzində maddi yardımı sahibkarların plastik kartlarınaköçürəcək.
“Diqlas” ticarət mərkəzində yanğın martın 26-da səhər saatlarında baş verib.
Prezident İlham Əliyev martın 29-da yanğın nəticəsində zərər çəkmiş sahibkarlara maddi yardım göstərilməsi məqsədi ilə dövlət büdcəsindən ilkin olaraq 3 mln. manat məbləğində vəsaitin ayrılması haqqında sərəncam imzalayıb. Maliyyə Nazirliyi artıq bu vəsaiti İqtisadiyyat Nazirliyinin hesabına köçürüb.
Nazirliyin məlumatına görə, yanğın nəticəsində 441 sahibkara maddi zərər dəyib.
