İraqın Baş naziri Məhəmməd əs-Sudani və “Lukoil”in təsisçisi Vahid Ələkbərov Rusiya şirkətinə qarşı ABŞ sanksiyalarının altı ay müddətinə ertələnməsi imkanını müzakirə ediblər.
Xatırladaq ki, dünən İraqın Baş naziri ilə milyarder Ələkbərovun görüşü baş tutub. İraq hökumətinin məlumatına görə, görüşdə neft tədarükünün sabitləşdirilməsi və ABŞ sanksiyalarının İraqın neft hasilatı imkanlarına təsir göstərməməsi məsələləri müzakirə olunub.
İraq hökuməti ABŞ-yə neft nazirliyi vasitəsilə müraciət göndərməyi planlaşdırır və “Lukoil”in altı ay müddətinə sanksiyalar siyahısından çıxarılmasını xahiş edib. Bu qərar şirkətin “Qərbi Qurna-2” yatağındakı fəaliyyətləri ilə bağlıdır — Rusiya şirkəti burada 75% paya sahibdir.
22 oktyabrda ABŞ Maliyyə Nazirliyi “Lukoil”a və onun törəmə şirkətlərinə qarşı sanksiyalar tətbiq edib və bütün əməliyyatların 21 noyabra qədər tamamlanmasını tələb edib. Ötən həftə ABŞ maliyyə nazirliyi şirkətin beynəlxalq biznesinin satışı ilə bağlı tranzaksiyalara 13 dekabradək icazə verən lisenziya təqdim edib. Sanksiyalara məruz qaldıqdan sonra “Lukoil” xarici aktivlərini satmaq niyyətində olduğunu açıqlayıb. 14 noyabrda “Lukoil” bir neçə potensial alıcı ilə danışıqlar apardığını bildirib.
