“Agro Dairy” MMC-də 2023-cü ildə yüksələn gəlirlərə rəğmən bioloji aktivlər üzrə itkilər hesabına əməliyyatı zərərlə tamamlanıb. Son il üzrə zərər öncəki ildən xeyli fərqlə artıb.
Banker.az xəbər verir ki, aqrar şirkət 2023-cü ildə 56.84 mln. manatlıq müqavilələrdən gəlir əldə edib. Bu, 2022-ci ildəki 36.97 mln. manatı 54 faiz üstələyib. Lakin satışların maya dəyəri hesabat ilində 59.39 mln. manat olub. Şirkət bununla ümumi 2.55 mln. manatlıq zərər yaranmasına məruz qalıb – halbuki, 2022-ci ildə 6.12 mln. manat ümumi mənfəət vardı.
Əlavə olaraq, 11.4 mln. manatlıq bioloji aktivlərin və kənd təsərrüfatı məhsullarının yenidən qiymətləndirilməsi zamanı zərər edib.
Şirkətin əməliyyat zərəri 10.59 mln. manat (2022: 0.29 mln. mənfəət) olub. Şirkətin keçən il əlavə olaraq maliyyə xərclərinin 16.21 mln. manatdan 21.56 mln. manata qalxması xalis zərərin həcminin artımını dəstəkləyib.
Kənar audit “Agro Dairy” MMC-nin 2023-cü il üzrə 32.14 mln. manatlıq xalis zərərini tanıyıb. Məsələn, 2022-ci ildə zərərin həcmi 16.39 mln. manatın altında idi.
Bu zərərdən sonra kapital balasındakı illərin yığılmış zərəri 1 yanvar 2024-cü il tarixinə 97.6 mln. manata yüksəlib. Nəzərə alsaq ki, şirkətin nizamnamə kapitalı 11.8 mln. manat və 227.8 mln. manat digər ehtiyatları var – o zaman xalis aktivlər zərər səbəbindən 142 mln. manata düşüb.
Aqrar biznesin cəmi aktivlərinin həcmi 312.11 mln. cəmi öhdəlikləri 170.11 mln. manatdır.
Xatırladaq ki, “Agro Dairy” MMC “PASHA Holding” MMC-nin idarəetməsində daxildir və 2014-cü ildə təsis edilib. Bu gün şirkət Azərbaycanın aparıcı kənd təsərrüfatı şirkətlərindən biridir. Baş ofisi Bakıda yerləşir. Şirkət Samux, Tovuz və Hacıqabulda əkin sahələrinə sahibdir.
