İslam Əməkdaşlıq Təşkilatı (İƏT) diplomatik əlaqələrini kəsmiş Əlcəzair və Mərakeşə çağırış edib.
“Anadolu” xəbər verir ki, Əlcəzairin Mərakeşlə diplomatik əlaqələrini kəsdiyi haqda məlumatdan sonra İƏT Baş Katibliyi vəziyyəti izləməyə başlayıb.
İki ölkənin ali maraqlarına və mehriban qonşuluq prinsipinə sadiq qalmalı olduğu vurğulanıb.
“Mərakeş və Əlcəzair tarixin və ortaq maraqların birləşdirdiyi, İƏT-in fəal üzvlərindən olan iki ölkədir. Biz tərəfləri fikir ayrılıqlarının dialoq yolu ilə həll edilməsinə çağırırıq. Əlcəzair və Mərakeş dialoq dilini mənimsəməlidirlər”, – məlumatda qeyd edilib.
Qeyd edək ki, dünən Əlcəzairin xarici işlər naziri Ramtan Lamamra Mərakeşin Əlcəzairdəki terror qruplaşmalarını dəstəklədiyini və “son dövrlərdəki düşməncə hərəkətlər”i əsas gətirərək ölkəsinin Mərakeşlə bütün diplomatik əlaqələri kəsdiyini bəyan etmişdi.
