İtaliyanın “Eni” enerji şirkəti “British Neptune Energy”ni 4.9 milyard dollara alır. Bu barədə təşkilatlar bu gün, iyunun 23-də məlumat verib. Müqavilə tənzimləyicilərin təsdiqindən sonra 2024-cü ilin birinci rübündə tamamlana bilər.
Birləşmənin mümkünlüyü bir neçə aydır müzakirə olunur. Müqavilənin şərtlərinə görə, şirkətin əsas hissəsi 2.6 milyard dollara birbaşa “Eni”yə keçəcək. Eyni zamanda “Neptune”nin Norveç bölməsi 2.3 milyard dollar ödəyəcək “Var Energi”nin nəzarətinə keçəcək, Almaniya bölməsi isə ayrılacaq və sövdələşməyə daxil edilməyəcək.
“Eni” qeyd edir ki, “Neptune Energy”nin alınması 2030-cu ilə qədər qaz hasilatını 60% artırmaq planını yerinə yetirməyə kömək edəcək.
May ayında ABŞ-ın enerji şirkəti “Chevron” neft-qaz şirkəti “PDC Energy”ni 7.6 milyard dollara alıb. Mütəxəssislər neft və qaz şirkətlərinin keçən il rekord gəlir əldə etməsindən sonra enerji sektorunda daha çox birləşmələrin ola biləcəyini deyirlər.
