Jaguar Land Rover satışların azalması fonunda xərcləri azaltmaq üçün işçi sayını ixtisar etməyə hazırlaşır. Şirkət rəhbər vəzifələr də daxil olmaqla könüllü işdən ayrılma proqramına başladığı barədə əməkdaşları məlumatlandırdığını açıqlayıb.
Financial Times və The Sunday Times-ın mənbələrinə görə, JLR qarşıdakı iki il ərzində 4 minədək əməkdaşı ixtisar edə bilər. Bununla belə, istehsal müəssisələrində çalışan işçilərin ixtisarı nəzərdə tutulmur.
Şirkət satışların zəifləməsi fonunda iki il ərzində təxminən 1,7 milyard funt sterlinq, yəni 2,3 milyard dollar qənaət etməyi planlaşdırır. JLR həmçinin zərərsiz fəaliyyət həddini 300 min avtomobilədək azaltmaq istəyir.
2025-ci ildə JLR-in Böyük Britaniyada dörd zavod üzrə təxminən 34 min əməkdaşı çalışıb. Şirkətin təchizat zəncirində isə əlavə olaraq təxminən 120 min nəfər məşğul olub.
Financial Times ixtisarların əsas səbəblərindən biri kimi Çin avtomobil istehsalçıları ilə artan rəqabəti göstərir. The Sunday Times və Bloomberg isə JLR-ə təzyiq edən amillər sırasında ABŞ Prezidenti Donald Tramp administrasiyasının 2026-cı ilin iyulunda avtomobil idxalına tətbiq etdiyi 10%-lik gömrük rüsumlarını da qeyd edirlər.
Sentyabrın əvvəlində Range Rover ilk elektrik modeli olan Range Rover Electric-i təqdim edib. Avtomobilin Autobiography versiyasının qiyməti təxminən 208 min dollar, SV Black versiyasının qiyməti isə 304 min dollar təşkil edir.
