Karlsruhe Universiteti Almaniyanın qədim texniki universitetlərindən biridir və 1825-ci ildə bir neçə məktəbin bazasında yaradılmışdır. Universitet 1902-ci ildən etibarən Hersoq Fridrixin adını daşıyırdı və yalnızca 5 iyul 1967-ci ildə bu təhsil müəssisəsinin adı Karlsruhe olaraq dəyişdirilir.
Universitetə 120 institut və 11 fakultə daxildir. Bunlar riyaziyyat, fizika, kimya-biologiya, humanitar və sosial elmlər, memarlıq, mühəndislik, maşınqayırma, texnologiya, elektrotexnika, iqtisadiyyat və informatikadır. Bu fakultələrdən ən məşhuru informatika, maşınqayırma və iqtisadiyyat fakultələridir.
Almaniyada ilk kimya mühəndisliyi fakultəsi 1969, ilk informatika fakultəsi isə 1972-ci ildə məhz bu universitetdə yaradılmışdı. Bu fakultələr Avropada ən yaxşı fakultələr hesab edilir.
Universitetin kompüter mərkəzi Alman universitetləri sırasında ən böyük və ən müasiridir. Bu universitetdə təhsil alan tələbələrin sayı 18 mindən çox olduğu bir zamanda, müəllim heyətinin sayı 300-ə çatır. Təhsil müəssisəsinin ümumi işçi heyətinin sayı isə təqribən 4 minə yaxındır. Karlsruhe universitetinin rektoru isə Horst Hipplerdir.
Burada təhsil alan əcnəbi tələbələr ümumi tələbə kollektivinin 20%-ni təşkil edir ki, bu da Almaniyada ən yüksək göstərici deməkdir.
