Karyera inkişafı üçün onlayn reputasiyamız nə qədər önəmlidir?

0

İş dünyasında uğurlu karyera qurmaq üçün təhsil, professional təcrübə və çeviklik olduqca önəmlidir.

Bununla bərabər hazırki günümüzdə işəgötürənlərin diqqət yetirdiyi önəmli amillərdən biri də onlara iş üçün müraciət edən namizədin şəxsi reputasiyasıdır.


Kredit müraciəti

Sizin müraciətiniz banka göndərildi.

Şirkətlər tərəfindən iş üçün müraciət edən namizəd barəsində oflayn məlumatların əldə olunması daha çətin olduğundan, onun barəsində ilkin rəyin formalaşdırılması üçün araşdırmalar online axtarış platformaları (google və s.) və sosial şəbəkələlər vasitəsi ilə aparılır.

Şəxsi reputasiyanın işəqəbul prosesinə necə təsir etdiyini anlamaq üçün PR üzrə mütəxəssis Anar Əskərovdan soruşduq.

– İnsanların şəxsi reputasiyası onların işəqəbul prosesinə necə təsir edir?

– İlk öncə paylaşdığımız informasiyanın şəxsi və ya ictimai olmasını anlamalıyıq. Bu fərqi həmin anda dərk etməyə bilərik. Lakin hər hansı bir məlumat paylaşdıqda ona daha uzunmüddətli perspektivdən yanaşmaq lazımdır. Bu gün hər hansı bir fəaliyyətinizlə bağlı paylaşdığınız fikir, foto və ya video sizə və izləyicilərinizə maraqlı və əyləncəli gələ bilər, lakin 5 il sonra bu məlumatlar sizin əleyhinizə işləyə bilər. Musiqi zövqü belə bir insanın hansı xarakterdə olmasını müəyyən etməyə kömək edir. İnternetdə, sosial şəbəkələrdə paylaşdığımız məlumatlarla biz özümüz barədə “izlər” qoyuruq. Buna “Digital ayaq izləri” deyilir. Bir çox şirkətlər də hər hansı mütəxəssisi işə qəbul etməzdən öncə bu “digital ayaq izləri”ni diqqətlə nəzərdən keçirir. Bu zaman bir mənfi iz müsbət izləri kölgədə qoya bilər və həmin insan nə qədər bacarıqlı və mütəxəssis olmasına baxmayaraq işə qəbul edilməyə bilər.

Böyüməkdə olan yeni nəslin onlayn reputasiyası həm də onların valideynlərinin üzərinə düşür. Çünki uşaqlar dünyaya gəldiyi gündən valideynləri onlar barədə məlumatları öz sosial şəbəkələrində paylaşırlar.
PR üzrə mütəxəssis Anar Əskərov

Bir vacib məqamı da qeyd etməyim yerinə düşərdi. Böyüməkdə olan yeni nəslin onlayn reputasiyası həm də onların valideynlərinin üzərinə düşür. Çünki uşaqlar dünyaya gəldiyi gündən valideynləri onlar barədə məlumatları öz sosial şəbəkələrində paylaşırlar. Valideynlərə uşaqları barədə paylaşdıqları hər bir kontentə həssaslıqla yanaşmağı tövsiyyə edirəm. Bütün bu məlumatlar uşaqları böyüdükdən sonra onların xarakterlərinə və karyeralarına müsbət və ya mənfi təsir edə bilər.

Hər bir sosial şəbəkənin paylaşılan məlumatlarını kimin görüb-görməməsini idarə etmək olur. Bu funksiyalardan istifadə etmək vacibdir. Məsələn, sosial şəbəkədə yeni iş axtarmağınız barədə elanı dostlarınızla paylaşarkən onu iş yoldaşlarınız və ya menecerlərinizdən gizlətmək daha məntiqli olar.

– İşaxtaran şəxslər onlayn reputasiyasını necə formalaşdırmalıdır ki, bu, işəgötürəndə ona qarşı müsbət fikir formalaşdırsın?

– Hər bir sosial şəbəkənin özünə uyğun standarları olmasına baxmayaraq məsləhət görürəm ki, bütün sosial şəbəkələrdə profil fotonuz eyni olsun. Yəni “Facebook”da profil fotonuzun yay tətilində istirahət zamanı çəkilmiş bir foto, “LinkedIn”də isə vəsiqə fotonuzun olması vizuallıq baxımından doğru olmaya bilər. Sizin haqqınızda təəsürat yaradan digər vacib məqam profillərinizdə hansı peşənin sahibi olmağınızı qeyd etməyinizdir. Bu sizin işinizə professional yanaşmağınızdan və məsuliyyətinizdən xəbər verir. Məsələn, media mütəxəssisi, jurnalist, həkim, insan resursları mütəxəssisi və s. Həmçinin, iş üçün müraciət etdiyiniz şirkətin və brendin sosial şəbəkədə səhifəsini bəyənməyiniz işinizə yaraya bilər. Bu arada, həmin şirkət barəsində hər hansı neqativ rəyiniz olub-olmamasını yoxlamağınız vacibdir. Əgər elə rəyiniz olubsa, onu gizlətməyin tam vaxtıdır.

©finans.az