Kiçik və orta biznesin (KOB) dəstəklənməsi üzrə yeni stimullaşdırıcı modellərin, sahibkarların qanuni maraqların müdafiəsi ilə bağlı onlayn platformanın və sahibkarların müasir dövrün tələblərinə uyğun “consulting” sisteminin yaradılması hazırda Kiçik və Orta Biznesin İnkişafı Agentliyinin (KOBİA) reallaşdırdığı əsas layihələr sırasındadır. Bunu KOBİA-nın İdarə Heyətinin sədri Orxan Məmmədov bildirib.
Onun sözlərinə görə, bu layihələr müasir dövrün çağırışlarına uyğun yeni idarəetmə modellərinin yaradılması, qanunvericiliyin təkmilləşdirilməsi ilə müşayət edilməkdədir: “Ötən dövrdə Agentliyin təşəbbüsü ilə Vergi Məcəlləsinə edilmiş son dəyişikliklər nəticəsində kiçik və orta biznesin müəyyənləşdirilməsi üçün yeni meyarlar təsdiq olunub. Yaxın gələcəkdə KOB-lara daxili bazar araşdırılmasının aparılmasına, satış imkanlarının genişləndirilməsinə, müxtəlif layihələrin maliyyələşdirilməsinə və bu kimi digər sahələrdə dəstək tədbirlərinin həyata keçirilməsi nəzərdə tutulur”.
O. Məmmədov onu da bildirib ki, KOBİA-nın təşkilatçılığı və sahibkarlara maliyyə dəstəyi göstərən qurumların, o cümlədən bir sıra bankın iştirakı ilə bu ilin may ayının 2-də Agentliyin sosial media səhifəsində canlı olaraq yayımlanacaq KOB-ların maliyyə resurlarına çıxış imkanları sayəsində onlayn marifləndirmə prosesi təşkil ediləcək.
