Kolumbiya BRICS-ə qoşulmaq istəyir. Bunu ölkənin xarici işlər naziri Luis Gilberto Murillo deyib. Cənab Murillo qeyd edib ki, Kolumbiya BRICS-də, xüsusən də iqtisadiyyat və ticarət sahəsində gedən prosesləri “böyük maraqla izləyir”.
Kolumbiyalı nazir qeyd edib ki, bu təşkilat “alternativ baxış” təklif edir. O, Kolumbiyanın Braziliya və Hindistanla BRICS-ə üzv olmaq imkanını müzakirə etdiyini təsdiqləyib. Nazir həmçinin ölkənin 2025-ci ildə icmaya qoşulması ilə bağlı perspektivləri dəyərləndirib.
Hazırda BRICS-ə doqquz ölkə daxildir: Rusiya, Braziliya, Hindistan, Çin, Cənubi Afrika, Misir, İran, BƏƏ və Efiopiya. Ötən həftə Belarus rəsmi olaraq assosiasiyanın tərəfdaşı olub. Qazaxıstan, Malayziya və Türkiyə təşkilata üzv olmaq üçün dəvət alıb. Dünən, noyabrın 14-də Boliviya təşkilatın tərəfdaş ölkəsi olmağa razılaşıb.
