Cümə günü kriptovalyuta bazarında kəskin eniş qeydə alınmışdı. Belə ki, altkoin indeksi ABŞ prezidenti Donald Trampın Çin idxalına 100%-lik rüsum tətbiq edə biləcəyi xəbərindən sonra 40% ucuzlaşıb. Banker.az xəbər verir ki, bu barədə Bloomberg agentliyi məlumat yayıb.
Eniş qısa müddətli olsa da, o, kriptobazarın bir sıra əsas problemlərini üzə çıxarıb — bazarların həftəsonu aşağı likvidliyi, həddindən artıq kredit çiyni və avtomatik likvidasiya mexanizmləri. “Hyperliquid” platformasında 10 milyard dollardan çox, “Binance”də isə 2,4 milyard dollarlıq mövqelər bağlanıb. Ümumi likvidasiyalar 19 milyard dollara çatıb. “Binance”dəki texniki nasazlıq vəziyyəti daha da gərginləşdirib, lakin birja sonradan istifadəçilərə 283 milyon dollar kompensasiya ödəyib.
Agentlik yazır ki, marja çağırışları və avtomatik borc azaldılması sistemləri qiymət enişini sürətləndirib. Son aylarda kredit çiyninin kəskin artması və bir çox mövqelərin eyni aktivlərlə təmin olunması riski daha da yüksəldib. Kripto birjaların zərər kompensasiyası üçün nəzərdə tutulmuş sığorta fondları itkiləri qarşılaya bilməyib və nəticədə “son müdafiə xətti” — avtomatik borc azaldılması işə düşüb.
Kriptovalyuta bazarı hələ də ənənəvi maliyyə sistemlərində mövcud olan “təhlükəsizlik şəbəkələrinin” yoxluğu səbəbindən kəskin satışlara qarşı çox həssasdır. Son eniş sektora bir daha onun nə qədər kövrək və qeyri-sabit olduğunu xatırladıb — xüsusilə də Uol-Stritlə inteqrasiya və legitimlik axtarışları mərhələsində.
