Çin sədri Si Cinpin Rusiyanın xarici işlər naziri Sergey Lavrovu qəbul edib. Məlumata görə, görüş Pekində baş tutub. Onlar digər məsələlərlə yanaşı, Vladimir Putinin Çinə səfərinə hazırlıq məsələlərini də müzakirə ediblər.
Cənab Lavrov Çin liderinə prezident Putinin “dostluq salamlarını və xoş arzularını” çatdırıb. Tərəflər yüksək səviyyədə ikitərəfli əlaqələri müzakirə ediblər. Rusiyalı nazir beynəlxalq və regional gündəliyin müəyyən aktual mövzularına da toxunub.
Çin sədri Vladimir Putinin qarşıdan gələn səfərini alqışlayıb və qeyd edib ki, onların “çoxdankı və yaxşı dostluğu var”. Si Cinpin iki ölkənin münasibətlərini yüksək qiymətləndirib və Rusiya ilə hərtərəfli tərəfdaşlıq və strateji qarşılıqlı əlaqə qurmaq istəklərini bir daha təsdiqləyib.
Sergey Lavrov Şanxay Əməkdaşlıq Təşkilatı (ŞƏT) ölkələrinin iclasında iştirak etmək üçün iyulun 13-də Çinə səfər edib. Cənab Putinin Çinə səfəri avqustun 31-dən sentyabrın 3-dək nəzərdə tutulub. Rusiya prezidentinin Si Cinpinlə əvvəlki görüşü mayın 8-də Moskvada baş tutub.
