Macarıstan oktyabrın 4-də Avropa İttifaqının (Aİ) Çindən gətirilən elektromobillər üçün kompensasiya tədbirlərinin tətbiqi təşəbbüsünü dəstəkləməyəcək.
Bu barədə Macarıstanın baş nazirinin ofisində beynəlxalq kommunikasiyalar və əlaqələr üzrə dövlət katibi olan Zoltan Kovaç “X” sosial şəbəkəsində Macarıstanın xarici işlər naziri Peter Siyartoya istinadən yazıb.
“Macarıstan qəti şəkildə Aİ-nin Çinin elektrik avtomobillərinə qarşı cəza rüsumlarının tətbiqi ilə bağlı təhlükəli təklifinin əleyhinə səs verəcək. Avropa avtomobil şirkətləri Çin tədarükçüləri ilə dərin strateji əlaqələrə malikdir və Çini vacib bazar kimi nəzərdən keçirirlər”, – Kovaç bildirib.
Nazir bunu onunla əsaslandırıb ki, Avropanın böyük avtomobil istehsalçıları, o cümlədən Macarıstanda fabrikləri olanlar rüsumların artırılmasına qarşıdırlar, çünki bu, Çinin cavab tədbirləri görməsinə səbəb ola bilər.
Daha əvvəl “Euractiv” portalı səsvermənin əvvəlcə sentyabrın 25-də keçirilməli olduğunu, lakin Çinlə əlavə danışıqların aparılması üçün onun oktyabrın 4-nə təxirə salındığını bildirmişdi. Avropa Komissiyası, öz növbəsində, Çin hökumətinin bu sahəyə verdiyi subsidiyalardan irəli gələn bazar təhriflərini tarazlaşdırmaq üçün Çin istehsalçılarına cəmiyyətə təqdim olunan elektrik avtomobilləri üçün minimum qiymətlərin tətbiqini təklif edib.
Eyni zamanda, mövcud müvəqqəti tariflərin ləğvi üçün Aİ-nin 27 dövlətindən 15-nin nümayəndəsi AK layihəsinin təsdiqinin əleyhinə səs verməlidir. Hələlik yalnız Kipr, Malta, Macarıstan, İspaniya və Slovakiya Çinə qarşı ticarət məhdudiyyətlərini dəstəkləməyəcəklərini açıqlayıblar, İsveç və Çexiya isə hələ yekun qərar verməyib.
