ABŞ dövlət katibi Marko Rubio Venesuela müxalifətinin lideri Mariya Maçado ilə görüş keçirəcək. Rubionun iş qrafikinə əsasən, danışıqlar Dövlət Departamentində baş tutacaq.
Görüş yerli vaxtla saat 13:00-da (Bakı vaxtı ilə 22:00) keçiriləcək.
Yanvarın 15-də ABŞ prezidenti Donald Tramp da Maçado ilə görüşmüşdü. Venesuela müxalifətinin lideri ona Nobel Sülh Mükafatı medalını təqdim etmişdi. Yanvarın 20-də isə ABŞ lideri Maçadonun fəaliyyətini yüksək qiymətləndirərək, Venesuela ilə bağlı vəziyyətin həllinə onu məmnuniyyətlə cəlb edəcəyini bildirmişdi.
Yanvarın 3-də ABŞ qüvvələri Venesuela prezidenti Nikolas Maduronu və onun həyat yoldaşı Siliya Floresi ələ keçirib. Ölkənin müvəqqəti idarəçiliyi vitse-prezident Delsi Rodrigesə keçib. Tramp bildirmişdi ki, Venesuela üzərində nəzarət bir ildən çox davam edə bilər. O vurğulayıb ki, Maduronun keçmiş tərəfdarlarından ibarət müvəqqəti administrasiya “ABŞ-nin zəruri hesab etdiyi hər şeyi verir”.
