Sahibkar İlon Mask ehtimal edib ki, artıq 20 ildən sonra insanlar “öz zehnlərini” robotlara yükləyə biləcəklər, yəni şüur və xatirələri bioloji olmayan bədənə köçürmək mümkün olacaq. O, bunu Leks Fridman ilə podkastında deyib. Mask qeyd edib ki, bu texnologiya “rəqəmsal ölümsüzlüyə” doğru bir addım ola bilər.
Mask bu ideyanı öz layihələri ilə əlaqələndirib — “beyin-kompüter” interfeysini hazırlayan “Neuralink” startapı və insanabənzər robotlar yaradan “Tesla Optimus” proqramı. Onun sözlərinə görə, əgər proses təhlükəsiz olsa və insanlara xatirələrini qorumağa və ya qabiliyyətlərini artırmağa imkan versə, “çoxları bunu etmək istəyəcək”.
Əslində söhbət neyro-məlumatların ehtiyat surətinin çıxarılması, şüurun maşınla birləşdirilməsi və ya şəxsiyyətin tam şəkildə süni bədənə köçürülməsi imkanlarından gedir. Mask qeyd edib ki, belə texnologiyalar insana fiziki ölümündən sonra da varlığını davam etdirməyə şərait yarada bilər, lakin hələlik bu, uzunmüddətli perspektivdir.
Mütəxəssislər bildirirlər ki, “zehni yükləmə”yə qədər bəşəriyyətin ciddi elmi və etik maneələri aşması lazımdır. Alimlər hələ də insan şüurunu rəqəmsal formaya necə çevirmək mümkün olacağını tam anlamayıblar. Bundan əlavə, şəxsiyyət hüquqları, kimliyin qorunması və zehnə müdaxilə riskləri ilə bağlı suallar da açıq qalır.
Mütəxəssislərin skeptisizminə baxmayaraq, Mask əmindir ki, neyrotexnologiyaların və robot texnikasının inkişafı insanın maşınla birləşə biləcəyi anı yaxınlaşdırır.
