“The Wall Street Journal”ın mənbələrinə görə, “OpenAI” və “Anthropic” kimi müştəriləri olan “Mercor” startapı $350 milyon vəsait cəlb etməyə hazırlaşır. Məlumatlara əsasən, raundun yekun qiymətləndirməsi $10 milyard ola bilər.
“Mercor” 2023-cü ildə Brendan Fudi (baş direktor), Adarş Hayremet (texniki direktor) və Surya Midha (keçmiş əməliyyat direktoru, hazırda idarə heyətinin sədri) tərəfindən təsis edilib. Onlar məktəbdən tanış idilər və daha sonra Piter Tilin “Thiel Fellows” proqramına qoşulublar — bu proqram kollec təhsilini yarımçıq qoyaraq öz şirkətini quranlara maliyyə dəstəyi verir.
Əvvəlcə “Mercor” insan resurslarının seçimi və idarə edilməsi sahəsində fəaliyyət göstərib. Şirkət süni intellekti istifadə edərək CV-lərin emalını və namizəd seçimini avtomatlaşdırıb, əsasən texniki ixtisaslara yönəlib.
Bu yanaşma nəticəsində “Mercor” süni intellekt şirkətlərinin çat-botları öyrətmək üçün istifadə etdiyi ixtisaslı mütəxəssislər bazası formalaşdırıb. Daha sonra şirkət çat-bot cavablarının keyfiyyətini qiymətləndirən podratçılar işə götürməyə başlayıb və fəaliyyət sahəsini hüquqşünaslar, həkimlər, jurnalistlər və digər peşələrə qədər genişləndirib.
Hazırda “Mercor”un bazasında təxminən 30 min podratçı var. Onlar şəkil nişanlama, mətn yazma və ekspert rəyinin verilməsi ilə məşğuldurlar. WSJ-nin məlumatına görə, əgər müştəri saatda təxminən $100 ödəyirsə, “Mercor” bu məbləğin 30–35%-ni özünə saxlayır, qalan hissəsini isə podratçıya verir. Şirkətdə orta saatlıq ödəniş təxminən $85 təşkil edir.
