Microsoft süni intellekt hesablamaları üçün nəzərdə tutulmuş ən yeni Maia 200 çipini təqdim edib. Şirkətin məlumatına görə, bu çip süni intellekt sahəsində hesablamaların genişləndirilməsi üçün qurulmuş güclü hesablama platformasıdır.
Maia 200, 2023-cü ildə təqdim olunmuş Maia 100 modelinin varisi hesab olunur və texniki baxımdan daha böyük və mürəkkəb süni intellekt modellərini daha sürətli və səmərəli işlətmək üçün optimallaşdırılıb. Çipin tərkibində 100 milyarddan çox tranzistor var, 4-bit rejimdə 10 petaFLOPS-dan çox, 8-bit rejimdə isə təxminən 5 petaFLOPS məhsuldarlıq təmin edir ki, bu da əvvəlki nəsillə müqayisədə əhəmiyyətli artımdır.
Burada söhbət modelin öyrədilməsindən deyil, artıq öyrədilmiş modelin işə salınması və işlədilməsi üçün tələb olunan hesablama gücündən – yəni inference mərhələsindən gedir. Süni intellektlə məşğul olan şirkətlər böyüdükcə, məhz inference xərcləri onların ümumi əməliyyat xərc strukturunda daha böyük pay tutmağa başlayır və bu da prosesin optimallaşdırılmasına marağı artırır.
Microsoft ümid edir ki, Maia 200 bu optimallaşdırmanın bir hissəsinə çevriləcək və süni intellekt ilə işləyən şirkətlərə daha az nasazlıqla, daha az enerji sərfiyyatı ilə işləməyə imkan verəcək.
Şirkət bildirir: “Təcrübədə bir Maia 200 nodu ən böyük müasir modelləri problemsiz şəkildə işlədə bilir və gələcəkdə daha böyük modellər üçün də kifayət qədər güc ehtiyatına malikdir”.
Yeni Microsoft çipi həm də texnoloji nəhənglərin öz çiplərini hazırlamağa yönəlməsi fonunda yaranan tendensiyanın bir hissəsidir. Məqsəd – süni intellekt üçün kritik əhəmiyyət daşıyan NVIDIA qrafik prosessorlarından asılılığı azaltmaqdır.
Maia ilə Microsoft bu alternativlərlə açıq şəkildə rəqabət aparmaq istədiyini göstərir. Şirkət bazar ertəsi yaydığı press-relizdə qeyd edib ki, Maia 200 Amazon-un üçüncü nəsil Trainium çipləri ilə müqayisədə FP4 rejimində təxminən 3 dəfə daha yüksək performans verir, FP8 rejimində isə Google-un yeddinci nəsil TPU-larını geridə qoyur.
Microsoft-un açıqlamasına görə, Maia artıq Superintelligence komandasının yaratdığı süni intellekt modellərinin işlədilməsində fəal istifadə olunur və Copilot çat-botunun arxa tərəfində də məhz bu çip dayanır. Şirkət bazar ertəsi etibarilə bildirib ki, müxtəlif tərəfdaşları – developerləri, alimləri və qabaqcıl İİ laboratoriyalarını Maia 200 üçün nəzərdə tutulmuş proqram təminatı inkişaf dəstindən (SDK) öz iş axınlarında istifadə etməyə dəvət edib.
