Microsoft-un səhmləri iyulun 30-da keçirilən hərracların yekununda 15,5% bahalaşaraq 451,1 dollara yüksəlib. Ticarət məlumatlarına görə, bu, şirkətin 2008-ci ilin oktyabrından bəri ən böyük birgünlük səhm artımı olub. Bu barədə Bloomberg məlumat yayıb.
Səhmlərin bahalaşması nəticəsində Microsoft-un bazar kapitallaşması təxminən 450 milyard dollar artıb. Bu, tarixdə bütün şirkətlər arasında bir gün ərzində qeydə alınmış ən böyük bazar dəyəri artımıdır. Əvvəlki rekord Nvidia-ya məxsus idi. Şirkətin kapitallaşması 2025-ci ilin aprelində Donald Trampın bir sıra ölkələrə tətbiq olunan idxal rüsumlarının dayandırıldığını elan etməsindən sonra bir ticarət sessiyasında 440 milyard dollar artmışdı.
Bloomberg-in hesablamalarına görə, Microsoft-un bir gündə əldə etdiyi 450 milyard dollarlıq artım ABŞ-ın S&P 500 indeksinə daxil olan şirkətlərin 96%-nin bazar dəyərindən çoxdur. Bu məbləğ həmçinin indeksdə yer alan ən kiçik 41 şirkətin, o cümlədən Domino’s Pizza, Clorox və Hasbro-nun ümumi bazar dəyərini üstələyir.
Bundan əlavə, Microsoft-un bazar dəyərindəki birgünlük artım Cənubi Afrika Respublikası, Türkiyə, Finlandiya və Vyetnam kimi ölkələrin fond bazarlarının ümumi kapitallaşmasını da geridə qoyub.
Şirkətin səhmləri Microsoft 2026-cı maliyyə ilinin iyunda başa çatan dördüncü rübü üzrə maliyyə nəticələrini açıqladıqdan sonra kəskin bahalaşıb. İnvestorlar xüsusilə Azure bulud biznesinin gəlirlərinin 43% artmasını müsbət qiymətləndiriblər. Bu, 2022-ci ilin əvvəlindən bəri ən yüksək artım tempi olub. Bundan başqa, Microsoft cari il üçün kapital xərclərini artırmayacağını da təsdiqləyib.
