Moldova Prezidenti İqor Dodon deputatlara rüşvət verilməsini yolverilməz adlandırıb və parlamenti buraxmaq niyyətində olduğunu bildirib.
TASS xəbər verir ki, o, belə bəyanatla “Prezident cavab verir” televiziya verilişi zamanı Sosialistlər Partiyası və Demokrat Partiyasından ibarət hakim koalisiyanın deputatlarının kütləvi şəkildə müxalifətə keçməsi səbəbindən çoxluğu itirdiyi qanunverici məclisdəki vəziyyəti şərh edərkən deyib.
“Deputatların rüşvətlə ələ alınması biabırçılıqdır, utancvericidir, parlamentlə, demokratiya ilə və vətəndaşların rəyi ilə məzələnməkdir. Bu parlamentdə artıq 16-17 deputat pulla alınıb. Yaxın gələcəkdə növbədənkənar parlament seçkilərinin keçirilməsi üçün lazım olan bütün prosedurları başlatmaq üçün əlimdən gələni edəcəyəm. Bu, yeganə həll yoludur”, – İ.Dodon bildirib.
Onun fikrincə, parlament seçkilərini bu il noyabrın 1-nə təyin olunan prezident seçkiləri ilə birlikdə keçirmək daha rahat olardı.
Prezident qeyd edib ki, fraksiyanı tərk etməsi üçün pul təklif olunan bir neçə sosialist deputat artıq prokurorluğa müraciət edib və məsələ ilə bağlı cinayət işləri başlanılıb.
