“Moody’s Ratings” “Kapital Bank” ASC-nin uzunmüddətli yerli və xarici valyutada bank depozit reytinqlərini Ba2, bankın ba3 baza kredit qiymətləndirməsini (BCA) və düzəliş edilmiş BCA-sını, həmçinin digər qarşı tərəf riski reytinqlərini təsdiqləyib. Banker.az beynəlxalq reytinq agentliynin açıqlamasına istinadən xəbər verir.
Agentlik bankın uzunmüddətli depozit reytinqləri üzrə müsbət proqnozu da qüvvədə saxlayıb.
“Moody’s” qərarını bankın güclü aktiv keyfiyyəti, yüksək gəlirliliyi, bazar maliyyələşməsindən məhdud asılılığı olan sabit maliyyələşmə bazası və yüksək likvidliyi ilə əsaslandırıb.
Qeyd olunur ki, 2025-ci ilin sonuna bankın problemli kreditləri (IFRS 9 üzrə Mərhələ 3 kreditləri) ümumi kredit portfelinin təxminən 3,7%-ni təşkil edib, problemli kreditlər üzrə ehtiyatlarla təminat səviyyəsi isə 130% olub. Agentliyin qiymətləndirməsinə görə, “bankın aktiv keyfiyyətinin növbəti 12-18 ay ərzində əlverişli əməliyyat mühitinin dəstəyi ilə ümumilikdə sabit qalacağı gözlənilir.”
“Moody’s” bildirib ki, “Kapital Bank” 2025-ci ildə 275 milyon manat konsolidə edilmiş xalis mənfəət əldə edib. Nəticədə maddi aktivlər üzrə gəlirlilik (ROTA) 2,3%-ə yüksəlib, bu göstərici 2024-cü ildə 2% idi. Xalis faiz marjası isə 7,7%-dən 8,1%-ə yüksəlib. Vurğulanır ki, “güclənən xalis faiz marjası və bankın genişlənən tranzaksiya biznesinin yaratdığı komissiya gəlirlərinin dəstəyi ilə gəlirliliyin növbəti 12-18 ay ərzində ümumilikdə sabit qalacağı gözlənilir.”
Reytinq agentliyinin məlumatına görə, bankın maddi adi kapitalının (TCE) risklə ölçülmüş aktivlərə (RWA) nisbəti 2025-ci ilin sonunda 13,7%-dən 14,5%-ə yüksəlib. Bu artım əsasən yüksək mənfəətlilik və dividend ödənişi əmsalının azalması ilə əlaqələndirilib. 2025-ci ildə konsolidə edilmiş xalis mənfəət üzrə dividend ödənişi əmsalı 35%-ə enib, halbuki 2021-2024-cü illərdə orta göstərici 66% təşkil edib.
“Moody’s” həmçinin qeyd edib ki, 2025-ci ildə müştəri depozitləri 8% azalsa da, bankın kapital istisna olmaqla maliyyələşmə bazasının 80%-ni təşkil etməyə davam edib. Bankın əsas likvid aktivləri isə 2025-ci ilin sonuna maddi bank aktivlərinin 18%-dən çoxunu təşkil edib.
Agentlik bildirib ki, “Kapital Bank”ın Ba2 uzunmüddətli depozit reytinqi bankın ba3 BCA-sına və Azərbaycan hökumətindən yüksək dəstək ehtimalı qiymətləndirməsinə əsaslanır. Press-relizdə qeyd edilir ki, bu yanaşma bankın aktivlər üzrə ölkənin ikinci ən böyük bankı olması, kredit və müştəri depozitləri bazarında mühüm paya malik olması ilə əlaqədardır.
“Moody’s” uzunmüddətli depozit reytinqləri üzrə müsbət proqnozun həm Azərbaycanın suveren reytinqi üzrə müsbət proqnozu, həm də bankın kredit profilinin əlverişli əməliyyat mühitindən faydalanmağa davam edəcəyi gözləntisini əks etdirdiyini bildirib. Agentliyin qiymətləndirməsinə görə, Azərbaycanın suveren reytinqinin yüksəldilməsi növbəti 12-18 ay ərzində “Kapital Bank”ın depozit reytinqinin də yüksəldilməsinə səbəb ola bilər. Bununla yanaşı, gəlirlilik, kapital adekvatlığı və ya aktiv keyfiyyətində davamlı yaxşılaşma da reytinqlərin artırılmasını dəstəkləyə bilər. Əksinə, əməliyyat mühitinin əhəmiyyətli dərəcədə pisləşməsi və bunun bankın aktiv keyfiyyəti, gəlirliliyi və ya kapital adekvatlığını zəiflətməsi reytinqlərə mənfi təsir göstərə bilər.
