Neftin qiymətləri çərşənbə axşamı ABŞ Prezidenti Donald Trampın Rusiya neftinə ikiqat tariflər tətbiq edəcəyi və İrana hücum edəcəyi ilə bağlı təhdidlərindən sonra bir qədər yüksəldi. Bununla belə, qlobal iqtisadi artıma ticarət müharibəsinin təsiri ilə bağlı narahatlıqlar artımı məhdudlaşdırdı.
Banker.az xəbər verir ki, Bakı vaxtı ilə 08:40 radələrində Brent markalı neftin fyuçersləri 20 sent və ya 0.27% bahalaşaraq 74,93 dollara, WTI neftinin fyuçersləri isə 13 sent və ya 0,2% artaraq 71.61 dollara çatdı. Bu iki bençmark bir gün əvvəl beş həftənin ən yüksək səviyyəsində bağlanmışdı.
Analitiklər hesab edir ki, qısamüddətli risklər yüksəlişə meyllidir. ABŞ-ın Rusiya və İran neftinə ikinci tariflər tətbiq edəcəyi ilə bağlı təhdidləri bazar iştirakçılarının daha məhdud neft tədarükü risklərini qiymətləndirməsinə səbəb olur.
“Reuters”in mart ayında keçirdiyi sorğuda iştirak edən 49 iqtisadçı və analitik ABŞ-ın tarifləri və Hindistanla Çində iqtisadi yavaşlama səbəbindən neft qiymətlərinin bu il təzyiq altında qalacağını proqnozlaşdırıb. OPEC+ isə tədarükü artırır.
Qlobal iqtisadi artımın zəifləməsi yanacağa olan tələbi azalda bilər ki, bu da Trampın təhdidləri nəticəsində tədarükdə yaranacaq hər hansı azalmaları tarazlaya bilər.
Tramp bazar günü “NBC News”a verdiyi açıqlamada Rusiya Prezidenti Vladimir Putindən çox narazı olduğunu və Moskva Ukraynadakı müharibənin dayandırılması səylərinə mane olmağa çalışsa, Rusiya neft alıcılarına 25%-dən 50%-ə qədər ikiqat tariflər tətbiq edəcəyini bildirib.
Rusiyadan neft alanlara tətbiq olunacaq tariflər qlobal tədarükü poza və Moskvanın ən böyük müştəriləri – Çin və Hindistan üçün problemlər yarada bilər.
Əgər Tehran Ağ Evlə nüvə proqramı barədə razılığa gəlməzsə, Tramp həmçinin İranı da eyni tariflər və bombardmanlarla hədələyib.
İqtisadçılar hesab edir ki, hazırda bu, sadəcə Rusiyaya və İrana yönəlik təhdid kimi görünür. Lakin bu reallığa çevrilsə, bazar üçün ciddi yüksəliş riskləri yaradar, çünki hər iki ölkə böyük həcmdə neft ixrac edir.
Bazar diqqətini ABŞ-ın sənaye qrupu olan Amerika Neft İnstitutunun (API) həftəlik ehtiyatlar üzrə hesabatına yönəldib. Bu hesabat çərşənbə axşamı, rəsmi Enerji İnformasiya İdarəsinin (EIA) statistikası isə çərşənbə günü açıqlanacaq.
Bu arada, çərşənbə axşamı dolların zəifləməsi də bazarı dəstəklədi. Daha yumşaq dollar neftə olan tələbi artırır, çünki digər valyutalara sahib olan alıcılar üçün neft daha ucuzlaşır.
