2026-cı ildə Brent və WTI markalı neftin qiymətlərinin hazırkı 63 və 60 dollar səviyyələrindən aşağı düşəcəyi gözlənilir. Venesuela, Rusiya və İranla bağlı geosiyasi amillər, şübhəsiz ki, mühüm rol oynayacaq, lakin ABŞ Enerji İnformasiya İdarəsi (EIA) və Uoll-Strit bankları fundamental göstəricilərə əsaslanaraq gələn il üçün neft üzrə “ayı” (yəni eniş yönlü) proqnozlarını saxlayırlar.
Ən böyük analitik mərkəzlərin proqnozları
EIA (ABŞ):
EIA son qısamüddətli proqnozunda bildirir ki, 2026-cı il boyunca qlobal neft ehtiyatları artmaqda davam edəcək və bu, qiymətlərə təzyiq göstərəcək. Proqnoza görə, Brent qiyməti 2026-cı ilin birinci rübündə orta hesabla 54 dollara düşəcək və ilin yekununda orta 55 dollar olacaq. Bununla yanaşı, EIA əvvəlki ayla müqayisədə proqnozu 3 dollar artırıb — buna Çinin strateji ehtiyatlar üçün neft alışı və Rusiyaya qarşı sanksiyaların sərtləşdirilməsi təsir göstərib.
Macquarie Group:
Bankın analitikləri qiymətlərin düşməsini gözləyirlər, lakin Rusiyaya qarşı sanksiyaların, Venesuela ətrafındakı qeyri-müəyyənliyin və ABŞ-dəkı sərt hava şəraitinin bu enişi ləngidə biləcəyini qeyd edirlər. Onların fikrincə, bazarı sabitləşdirmək üçün OPEC+ 2026-cı ilin ikinci yarısında hasilatı azaltmağa məcbur qala bilər.
ABN AMRO Bank:
Bankın proqnozunda qeyd olunur ki, qlobal tələbin zəif artması və həm OPEC+, həm də kartelə daxil olmayan ölkələrdən təklifin çoxalması bazarın artıq həddindən artıq doyma halına gətirib. Qiymətlərin kəskin düşməməsinin səbəbi yalnız Çinin neft alışı və geosiyasi qeyri-müəyyənlik olub.
“Biz gözləyirik ki, təklif artıqlığı 2026-cı il boyunca davam edəcək və onun təsiri qiymətləri tədricən aşağı itələyəcək”, — deyə enerji üzrə baş iqtisadçı Mutaz Altaglibi bildirib.
ABN AMRO-nun proqnozuna görə, Brent birinci rübdə orta hesabla 58 dollar olacaq, ilin sonunda isə 50 dollara qədər düşəcək.
SEB Bank:
“Biz hələ də hesab edirik ki, qiymətlər üçün ən asan istiqamət aşağıdır”, — deyə keçən həftə xammal analitiki Ole Hvalbü bildirib.
ABŞ və Venesuela arasında artan gərginlik qiymətə cüzi qiymət əlavə etsə də, bu, artan təklif və dərinləşən profisit fonunda ümumi “ayı” tendensiyasını kompensasiya etmək üçün kifayət etmir.
Goldman Sachs:
Bank bazarda böyük təklif artığını görür və gözləyir ki, WTI 2026-cı ildə orta hesabla 53 dollar olacaq. Analitiklərin fikrincə, 2027-ci ildə bazar tarazlaşmalıdır, çünki 2026-cı il “bazarın həzm etməli olduğu son böyük neft təklifi dalğası” olacaq.
Geosiyasət hər şeyi dəyişə bilər
Təklif artığı ilə bağlı ümumi konsensus olsa da, geosiyasi şoklar vəziyyəti dəyişə bilər. Əsas risk Venesueladır. “Rystad Energy”nin fikrincə, ABŞ-nin hərbi müdaxiləsi halında Venesuela neftinin bazardan çıxması qlobal qiymətlərə ciddi təsir göstərəcək. Dünya bazarı təcili olaraq Venesuela neftinin əvəzini tapmalı olacaq və bu, ağır neft növlərində qıtlıq yaradaraq Dubai markasının Brent-ə nisbətdə bahalaşmasına səbəb ola bilər, çünki Çin itirilən həcmləri təcili şəkildə əvəzləməyə məcbur qalacaq.
