Neft qiymətləri cümə axşamı yüksəlib. Buna səbəb ABŞ–İran müharibəsi fonunda Hörmüz boğazının uzun müddət bağlı qalacağı ilə bağlı narahatlıqların artmasıdır. Münaqişə Yaxın Şərqdən mühüm neft və qaz axınlarını məhdudlaşdırır, istehsal obyektləri isə hasilatı azaltmağa məcbur olur.
Banker.az xəbər verir ki, Bakı vaxtına olan məlumata görə, Brent markalı neftin qiyməti 1.7 dollar və ya 2% artaraq bir barel üçün 84.07 dollar olub. WTI markalı neft isə 1.94 dollar və ya 2.60% bahalaşaraq 76.60 dollar/barel səviyyəsinə yüksəlib.
ABŞ–İran müharibəsi çərşənbə günü daha da genişlənib. ABŞ-ın zərbəsi nəticəsində Şri-Lanka sahilləri yaxınlığında İran hərbi gəmisi vurulub və ABŞ Senatında respublikaçılar Prezident Donald Trampın İrana qarşı hərbi kampaniyasını dəstəkləyiblər.
Senatorlar hava əməliyyatlarını dayandırmağı və İranla hərbi əməliyyatlar üçün Konqresin rəsmi icazəsini tələb edən iki partiyalı qətnamənin əleyhinə səs veriblər.
OPEC-in ikinci ən böyük xam neft istehsalçısı olan İraq ixrac marşrutu və saxlama imkanlarının çatışmazlığı səbəbindən gündəlik hasilatı təxminən 1.5 mln. barel azaldıb. Bu barədə rəsmilər “Reuters”ə bildiriblər.
Körfəzin ən böyük mayeləşdirilmiş təbii qaz istehsalçısı olan Qətər çərşənbə günü qaz ixracı üzrə fors-major elan edib. Mənbələrin sözlərinə görə, hasilatın normal səviyyəyə qayıtması ən azı bir ay çəkə bilər.
Qlobal enerji istehlakının təxminən beşdə birinin daşındığı əsas marşrutlardan biri olan Hörmüz boğazı vasitəsilə gəmiçilik İranla müharibə və Tehranın cavab tədbirləri fonunda artıq beşinci gündür demək olar ki, dayanıb.
Böyük Britaniyanın dəniz ticarəti əməliyyatları agentliyi bildirib ki, Küveytin Mubarak-Al-Kabir limanından 30 dəniz mili cənub-şərqdə lövbərdə dayanan tanker böyük partlayış səsini eşidib və partlayışı müşahidə edib. Daha sonra ərazidən kiçik bir gəminin uzaqlaşdığı görülüb.
J.P. Morgan müştərilərə göndərdiyi qeyddə bildirib ki, İran əsas enerji infrastrukturlarının çoxunu hədəfə almır, lakin gəmiçilik riskləri çox yüksək olaraq qalır. Bankın hesablamalarına görə, hazırda təxminən 329 neft tankeri Fars körfəzində ilişib qalıb.
Bank əlavə edib ki, Körfəz Əməkdaşlıq Şurası ölkələrində mövcud saxlama imkanları və hazırkı enerji qiymətləri ABŞ hərbi kampaniyasının müddətini məhdudlaşdıra biləcək amillərdir.
Bu təşkilata Səudiyyə Ərəbistanı, Birləşmiş Ərəb Əmirlikləri, Qətər, Küveyt, Oman və Bəhreyn daxildir.
“J.P. Morgan” bildirir ki, əksər neft yataqları bir neçə gün ərzində yenidən işə düşə bilər və tam istehsal gücü adətən iki-üç həftə ərzində bərpa olunur.
“Operatorlar xüsusilə İraqda yataqlarda təzyiqi tədricən bərpa etməlidir, çünki burada su inyeksiyası kritik rol oynayır. Lakin hazırda əsas məhdudiyyət geologiya deyil, logistika ilə bağlıdır”, – bank qeyd edib.
