Neft qiymətləri çərşənbə axşamı 1,5%-dən çox düşüb. Buna səbəb Ukraynanın ABŞ administrasiyasının Rusiya ilə münaqişənin dayandırılması üçün apardığı intensiv diplomatik səylərin nəticə verə biləcəyinə işarə etməsi olub.
Belə ki, münaqişənin başa çatması Moskva ilə enerji ticarətinə qarşı Qərb sanksiyalarının aradan qaldırılmasına yol aça bilər. Bu isə gələn il təklifin artacağı gözləntiləri fonunda əmtəə qiymətlərinin düşdüyü bir vaxtda tədarükün artmasına gətirib çıxaracaq.
“Brent” markalı neftin fyuçersləri 1,6% azalaraq bir barel üçün 62,34 dollar təşkil edib, ABŞ-nin “West Texas Intermediate” markalı neft fyuçersləri isə 1,7% azalaraq 57,85 dollar olub.
Ukraynanın Milli Təhlükəsizlik Xidmətinin rəhbəri Rustem Umerov bildirib ki, Ukrayna prezidenti Volodimir Zelenski yaxın günlərdə ABŞ-yə səfər edərək ölkə prezidenti Donald Tramp ilə razılaşmanı yekunlaşdıra bilər.
Lakin Rusiya vurğulayıb ki, heç bir razılaşmanın öz məqsədlərindən çox uzaqlaşmasına icazə verməyəcək. Bu mövqe neftin daha çox ucuzlaşmasının qarşısını alıb, çünki Rusiyanın mövqeyi rəsmi razılaşmanın əldə olunub-olunmayacağına dair şübhələr yaradır, — deyə “Onyx Capital Group”un neft analitiki Ed Heyden-Briffett qeyd edib.
“Tanqo üçün iki nəfər lazımdır və hələlik Rusiyanın razılaşıb-razılaşmayacağı aydın deyil”, — deyə UBS analitiki Covanni Staunovo bildirib.
Artan təklif təzyiq yaradır
Mütəxəssislər getdikcə daha çox hesab edirlər ki, 2026-cı ildə xam neft təklifinin artımı tələbin artımını üstələyəcək. “Deutsche Bank” gələn il gündəlik ən azı 2 milyon barel həcmində profisit proqnozlaşdırır və 2027-ci ilə qədər kəsir ehtimalı görmür.
“Commerzbank Research” analitikləri hesab edirlər ki, sülh razılaşması Rusiyaya hasilatı OPEC+ ilə razılaşdırılmış səviyyəyə qədər artırmağa kömək edə bilər.
“Rosneft” və “Lukoil” kimi Rusiya neft nəhənglərinə qarşı tətbiq edilən sanksiyalar həmçinin Hindistan neft emalı zavodlarını Rusiyadan alışları azaltmağa məcbur edib.
“Commerzbank” vurğulayıb ki, bu vəziyyət Rusiyanın neft ixracının azalmasına və dənizdə tankerlərdə saxlanılan Rusiya xam neftinin həcminin artmasına səbəb olub. Sülh razılaşması “Rosneft” və “Lukoil”a qarşı sanksiyaların aradan qaldırılmasına gətirib çıxarsa, həmin neft bazara çıxarıla bilər.
Rusiya həmçinin Çinə ixracın genişləndirilməsi yollarını müzakirə edir, — deyə Rusiyanın Baş nazirinin müavini Aleksandr Novak çərşənbə axşamı bildirib.
