ABŞ-da tələbin zəifləyə biləcəyi və qlobal tələbin təklifdən az olacağı ilə bağlı narahatlıqları, Yaxın Şərqdə və Ukraynada münaqişələrin təchizata təsiri ilə bağlı riskləri üstələməsi nefti həftə sonuna ucuzlaşdırıb.
Banker.az xəbər verir ki, Brent fyuçersləri 0.49 dollar və ya 0.74% azalaraq bir bareli 65.88 dollara, WTI isə 0.51 dollar və ya 0.82% ucuzlaşaraq 61.86 dollara geriləyib.
Sinqapur mənzilli “Phillip Nova” şirkətinin analitiki Priyanka Saçdeva bildirib ki, ABŞ-da inflyasiya ilə mübarizə hələ qalib gəlməyib, bu isə dünyanın ən böyük iqtisadiyyatında neftə tələbi zəiflədir. Geosiyasi gərginliklərə baxmayaraq, bazar artıq satış və zəif tələbat siqnalları ilə üzləşməkdədir.
Cümə axşamı açıqlanan hökumət hesabatlarına görə, ABŞ-da avqust ayı ərzində istehlak qiymətləri son yeddi ayda ən yüksək artımı göstərib. İşsizlik müavinətinə müraciət edənlərin də artması, ABŞ Federal Ehtiyat Sisteminin gələn həftə iqtisadiyyatı stimullaşdırmaq üçün faiz endiriminə gedə biləcəyi gözləntilərini gücləndirib.
Neft bu həftə əvvəldə 2%-ə qədər bahalaşmışdı, lakin cümə axşamından etibarən düşüş sürətlənib. Beynəlxalq Enerji Agentliyi qeyd edib ki, bu il OPEC və Rusiya kimi müttəfiqlərin hasilat artımları səbəbindən dünya neft təklifi gözləniləndən daha sürətlə yüksələcək.
OPEC isə 2025–2026-cı illər üçün yüksək tələbat proqnozunu dəyişməyib. Eyni zamanda, Səudiyyə Ərəbistanı oktyabrdan Çinə ixracını 1.65 mln. barelə qaldıracaq. ABŞ-da isə ötən həftə xam neft ehtiyatları 3.9 mln. barel artaraq 424.6 mln. barelə çatıb.
