Neftin qiymətləri cümə günü bir qədər aşağı düşdü və noyabr ayından bəri ilk aylıq azalma ilə bitirmiş olacaq. Vaşinqtonun tarif təhdidləri və ABŞ iqtisadiyyatının daha da zəiflədiyini göstərən əlamətlər qlobal iqtisadi artım və yanacağa olan tələbatla bağlı qeyri-müəyyənliyi artıraraq, təchizat narahatlıqlarını üstələməkdədir.
Banker.az xəbər verir ki, daha aktiv sayılan “Brent”in may fyuçersləri 31 sent və ya 0.4% ucuzlaşaraq 73.26 dollar/barelə düşün. ABŞ-nin “WTI” markalı xam nefti isə 31 sent və ya 0.4% ucuzlaşaraq 70.04 dollar/barel səviyyəsində qərarlaşıb. Cümə günü müddəti başa çatan “Brent” fyuçersləri isə 35 sent və ya 0.5% ucuzlaşaraq, 73.69 dollar/bareldən ticarət olunub. Hər iki neft markası son üç ayda ilk dəfə aylıq azalma istiqamətindədir.
Analitiklər düşünür ki, ABŞ-nin iqtisadi artımındakı azalma qorxuları, tariflər, OPEC+ təşkilatının aprel ayında hasilatı artırmaq planları və Ukraynada sülh ümidləri investorların risk iştahını azaldaraq qiymətlərin aşağı düşməsinə səbəb olur.
ABŞ prezidenti Donald Tramp cümə axşamı bildirib ki, Meksika və Kanadadan idxal olunan mallara 25% tarif tətbiq edilməsi martın 4-dən qüvvəyə minəcək. Bundan əlavə, Çin idxalına əlavə 10% rüsum qoyulacaq.
“Fitch”dən olan iqtisadçılar bildiriblər ki, bazar iştirakçıları Tramp administrasiyasının bu ay elan etdiyi enerji siyasəti ilə bağlı qərarlarının təsirini qiymətləndirməkdə çətinlik çəkirlər. ABŞ-nin tarif tədbirləri kimi mənfi faktorlar hazırda üstünlük təşkil edir.
İnvestorların əhval-ruhiyyəsinə mənfi təsir göstərən digər amillər arasında ABŞ-də işsizlik müavinətləri üçün müraciətlərin ötən həftə gözləniləndən çox artması və hökumətin iqtisadi artımın dördüncü rübdə yavaşladığını bir daha təsdiqləməsi də var.
Tramp ABŞ-nin neft nəhəngi “Chevron”a Venesuelada fəaliyyət göstərməyə icazə verən lisenziyanı ləğv edib və cümə axşamı neftin qiymətləri bu səbəbdən 2%-dən çox artıb.
“Reuters” agentliyinə danışıqlara yaxın mənbələr bildiriblər ki, bu ləğv ABŞ şirkəti ilə Venesuelanın dövlət neft şirkəti PDVSA arasında yeni bir razılaşmanın əldə olunmasına və xam neftin ABŞ-dən başqa istiqamətlərə ixrac edilməsinə yol aça bilər.
OPEC+ daxilindəki səkkiz mənbə bildirib ki, OPEC+ üzvləri (Azərbaycanda bu qrupa daxildir) hazırda aprel ayında hasilatı artırmaq və ya dondurmaq barədə müzakirələr aparırlar. Çünki Venesuela, İran və Rusiyaya qarşı yeni ABŞ sanksiyaları səbəbindən qlobal təchizat mənzərəsini dəyərləndirməkdə çətinlik çəkirlər.
