Amerikanın “Netflix” striminq xidməti “Warner Bros. Discovery” holdinqini 82,7 milyard dollara satın alır.
Razılaşma “Netflix” və “Warner Bros.” idarə heyətləri tərəfindən yekdilliklə təsdiqlənib. İyun ayında “Warner Bros.” biznesini iki şirkətə ayırmaq planlarını açıqlamışdı: “Streaming & Studios” və “Global Networks”. Birinciyə “Warner Bros Television”, “Warner Bros Motion Picture Group”, “DC Studios”, “HBO” və “HBO Max”, həmçinin onların film və televiziya kitabxanaları daxil olacaq. İkinciyə isə “CNN”, “TNT Sports”, “Discovery” və rəqəmsal məhsullar daxil ediləcək. Gözlənilir ki, bölünmə 2026-cı ilin III rübündə, “Netflix” ilə razılaşma bağlanmazdan əvvəl tamamlanacaq.
Sövdələşmənin bağlanması üçün həmçinin tənzimləyici qurumların icazəsi və holdinqin səhmdarlarının təsdiqi tələb olunur. Razılaşmanın 12–18 ay ərzində başa çatacağı gözlənilir.
Sövdələşmə tamamlandıqdan sonra “The Big Bang Theory”, “The Sopranos”, “Game of Thrones” kimi çoxsaylı franşizalar “Netflix” portfelinin bir hissəsinə çevriləcək və onlayn kinoteatra inteqrasiya olunacaq. “Netflix” daha geniş serial və film seçiminin istifadəçi axınını artıracağını, auditoriyanı daha uzun müddət platformada saxlayacağını və əməliyyat fəaliyyətindən əlavə gəlir gətirəcəyini gözləyir.
