“Nike” baş icraçı direktoru Elliot Hill-in biznesi yenidən qurmaq və böyüməni bərpa etmək planları çərçivəsində daha bir ixtisar mərhələsinə hazırlaşır.
Banker.az CNBC-yə istinadən xəbər verir ki, bu dəfə ixtisarlar şirkətin korporativ heyətinin 1%-dən azına təsir edəcək. “Nike” bildirib ki, EMEA və “Converse” bölmələri prosesdən kənarda qalacaq.
“Hazırda “Nike” yenidən formalaşma mərhələsindədir. Məqsəd idman və idman mədəniyyətini yenidən mərkəzə qoymaq, idmançılar və istehlakçılarla daha dərin əlaqə qurmaq və yalnız “Nike”a məxsus məhsullar yaratmaqdır”- deyə, Şirkət açıqlamasında qeyd edib.
Fevral ayında “Nike” daha geniş restrukturizasiya çərçivəsində 2% və ya 1 500-dən çox əməkdaşını ixtisar etmişdi. Hill isə yeni mərhələdə komanda strukturlarını dəyişərək şirkəti idman və mədəniyyətə fokuslamağı hədəfləyir.
Əvvəlki direktor Con Donahoe dövründə biznes idman növlərinə görə deyil, qadın, kişi və uşaq seqmentlərinə bölünmüşdü. Tənqidçilərə görə, bu yanaşma innovasiya tempini zəiflədib və şirkət daha çox geniş istehlakçı seqmentinə yönəlmiş həyat tərzi məhsullarına fokuslanıb. Hill isə indi bu yanaşmanı dəyişir.
Şirkət əməkdaşlara sentyabrın 8-dək təsirlənib-təsirlənmədiklərinin bildiriləcəyini, yeni vəzifələrin əksəriyyətinin isə sentyabrın 21-dən qüvvəyə minəcəyini açıqlayıb.
Hillin sözlərinə görə, “Nike”, “Jordan” və “Converse” komandaları bundan sonra idmana yönəlmiş, innovativ məhsul axınını təmin edən “sport-obsessed” qruplar kimi fəaliyyət göstərəcək.
