Dünən Nasdaq indeksi 1,5% gerilədi: ən çox ucuzlaşan şirkətlər Palantir (-9,4%), AMD (-5,4%) və Nvidia (-3,5%) oldu. Kapitalizasiyası $1 trilyondan çox olan səkkiz ən iri texnologiya şirkəti cəmi bir gündə $385 milyard itirdi. Müqayisə üçün, texnologiya şirkətlərinin payı daha az olan S&P 500 indeksi cəmi 0,6% azalıb.
Banker.az-ın məlumatına görə, satışların bir neçə səbəbi var. Birincisi, şişirdilmiş qiymətləndirmələr: aprel minimumlarından sonra Nasdaq 100 indeksi 40%-lik artım göstərib və hazırda gözlənilən mənfəətə nisbətdə 27 multiplikatorla ticarət olunur. Bu isə uzunmüddətli orta göstəricidən təxminən üçdə bir yüksəkdir. İkincisi, investorlar süni intellektin proqram təminatı şirkətlərinin biznesinə təsiri və iqtisadi artımın davamlılığı barədə şübhəlidirlər.
VanEck şirkətindən Anna Vu bildirib: “Qiymətləndirmələr tarixi maksimumlara çatdıqca treyderlər və hedc-fondlar səhmlərdən çıxmağa başlayır”. Enmə həm də investorların ehtiyatlı davranmasını əks etdirir – xüsusən də Jackson Hole tədbirində FED sədri Cerom Pauellin çıxışından öncə. Çıxışın investorların gözlədiyindən daha “qəti” tonlu ola biləcəyi ehtimal olunur.
Texnologiya şirkətləri faiz dərəcələrinin artımına xüsusilə həssasdır, çünki onların pul axınları daha çox gələcəyə yönəlib. Gəlirliliklərin yüksəlməsi isə bu axınların indiki dəyərini azaldır.
