Danimarkanın Novo Nordisk şirkətinin səhmləri bu gün 17% dəyər itirib və bir vaxtlar Avropanın ən bahalı şirkəti olan korporasiya yenidən top-10 siyahısından çıxıb. İlin əvvəlindən bəri səhmlər təxminən 10%, son bir il ərzində isə iki dəfə ucuzlaşıb. Hazırda şirkətin bazar dəyəri “Ozempic bumu”ndan əvvəlki səviyyədən cəmi iki dəfə yüksəkdir.
Dünənki enişin əsas səbəbi piylənməyə qarşı yeni nəsil dərmanların pioneri olan şirkətin bu il üçün satışların 13% azalacağına dair verdiyi proqnozdur. Bu, bazar gözləntilərinin əksəriyyətindən daha zəifdir və ilk növbədə Novo Nordisk-in əsas bazarı olan ABŞ-la bağlıdır. ABŞ-da Tramp administrasiyasının dövlət tibbi sığorta proqramı çərçivəsində Ozempic və Wegovy dərmanlarının qiymətlərinin endirilməsi qərarı satışlara ciddi təzyiq göstərir. Digər tərəfdən, Eli Lilly kimi rəqiblər alternativ preparatlarla bazarı sıxışdırır, bəzi ölkələrdə isə patent müddətinin bitməsi fonunda generik dərmanların satışları artır.
Bu niyə vacibdir?
Şirkətin baş icraçı direktoru Maziyar Mayk Dustdar maliyyə göstəricilərində “mənfi artımı” açıq şəkildə etiraf etməyə məcbur olub. Maliyyə direktoru Karsten Knudsen isə bildirib ki, qısamüddətli geriləmə uzunmüddətli artım perspektivlərinə təsir göstərməyəcək.
Bu, bir vaxtlar təkbaşına Danimarka iqtisadiyyatının artımının əsas hissəsini təmin edən şirkətin artıq keçmiş uğurlar hesabına böyümədiyini göstərir. Novo Nordisk-in satışlarında son dəfə illik azalma 2017-ci ildə, Ozempic-in kütləvi satışlarından əvvəl qeydə alınmışdı. Gələcək isə Wegovy-nin qeyri-inyeksiya formasının uğurundan və yeni preparatların bazara çıxarılmasından asılı olacaq.
Müsbət siqnallar da var. Birincisi, Wegovy-nin tablet formasının satışları inyeksiya variantlarının satışlarını “kanibalizasiya” etməyib. Artım əsasən yeni xəstələr hesabına baş verib: terapiyaya başlayan 170 min nəfərin 80%-i məhz yeni pasiyentlərdir. İkincisi, ABŞ-da qiymətlərin endirilməsi nəticəsində alıcı bazasının genişlənməsi ehtimalı mövcuddur.
