“Nvidia” səhmləri son dörd gün ərzində 17% bahalaşıb, nəticədə şirkətin kapitallaşması təxminən 424 milyard dollar artıb. Avqustun 13-də ticarətin bağlanışına qiymətli kağızlar 116.14 dollar (+6.53%) qiymətinə olub, Banker.az bu barədə Forbes.ru-ya istinadən xəbər verir.
“Bloomberg” qeyd edib ki, avqustun 5-də irimiqyaslı səhm satışından sonra “Nvidia”nın bazar dəyəri 900 milyard dollar azalıb. Agentlik yazır ki, tarixi eniş şirkətin kapitallaşmasına təsir göstərib.
Bununla belə, “Nvidia” səhmləri hələ də iyunun 18-də əldə edilən rekord qiymətdən 14% aşağıdır, “Bloomberg” yazır. Həmin gün şirkət kapitallaşmaya görə dünyada “Microsoft”u keçərək birinci yeri tutub.
“Bloomberg” qeyd edir ki, bir neçə gün ərzində “Nvidia” səhmlərinin 17% artması investorların qorxularını sakitləşdirməyəcək. Onlar hələ də ABŞ iqtisadiyyatından və yaxın bir neçə il ərzində süni intellektə yüz milyardlarla dollar sərmayə qoymaq istəyən texnologiya şirkətlərinin planlarından ehtiyat edirlər.
