OPEC Çində gözləntilərin zəif olduğunu əsas gətirərək, bazar ertəsi 2024-cü ildə qlobal neft tələbinin artımı ilə bağlı proqnozunu aşağı salıb, Banker.az bu barədə xarici mediaya istinadən xəbər verir.
Təşkilat aylıq hesabatında qlobal neft tələbinin 2024-cü ildə gündəlik 2.11 milyon barel artacağını bildirib.
Qeyd edək ki, bu, OPEC-in 2024-cü il üçün proqnozunda 2023-cü ilin iyulundan sonra ilk azalmadır. Təmiz yanacağa keçid sürəti ilə bağlı fikir ayrılıqları səbəbindən 2024-cü ildə neftə tələb artımının gücü ilə bağlı proqnozçular arasında böyük fikir ayrılığı var.
Hesabatdan sonra neft stabil olub, bir barel üçün 80 dolları keçib.
Hesabatda OPEC gələn il tələb artımı ilə bağlı proqnozunu əvvəllər gözlənilən 1.85 milyon bareldən 1.78 milyon barelə endirib.
OPEC+ bazarı dəstəkləmək üçün 2022-ci ilin sonundan etibarən hasilatı azaldıb. İyunun 2-də alyans gündəlik neft hasilatını 2.2 milyon azaltmaq qərarını sentyabrın sonuna qədər uzatmağa və oktyabr ayından etibarən mərhələli şəkildə dayandırmağa razılaşıb.
Sənayeləşmiş ölkələri təmsil edən Beynəlxalq Enerji Agentliyi (IEA) 2024-cü ildə neftə tələb artımını sutkada 970 min barel səviyyəsində proqnozlaşdırır. Xatırladaq ki, IEA dərc olunan məlumatları bu həftə yeniləyəcək.
