Alyansın sentyabrın 5-də dərc olunmuş rəsmi mesajında deyilir ki, OPEC+ neft hasilatının planlaşdırılan artımını iki ay təxirə salmaq barədə razılığa gəlib, Banker.az bu barədə Forbes-ə istinadən xəbər verir.
2023-cü ilin noyabr ayının sonunda OPEC+ ölkələri könüllü olaraq 2024-cü ilin əvvəlində gündəlik neft hasilatını 2.2 milyon barel azaltmaq barədə razılığa gəliblər. Bu ölkələrə Səudiyyə Ərəbistanı, Rusiya, İraq, Birləşmiş Ərəb Əmirlikləri, Küveyt, Qazaxıstan, Əlcəzair və Oman daxildir. Məhdudiyyətlərin aradan qaldırılması oktyabrda başlamalı idi və hasilat sutkada 180 min barel artmalı idi. Kommünikedə deyilir ki, sentyabrın 5-də keçirilən onlayn görüşdən sonra ölkələr oktyabr və noyabr aylarında neft hasilatını artırmamaq qərarına gəliblər.
Bundan əvvəl “İnterfaks” OPEC+ alyansının əsas iştirakçılarının vəziyyətlə tanış olan mənbəyə istinadən neft hasilatının artırılmasını iki ay təxirə salmaq qərarına gəldiyini yazmışdı.
“Bloomberg” qeyd edir ki, hazırda qlobal neft bazarları yay tələbi fonunda gərgindir, lakin istehlakın mövsümi pik həddi keçdikdən sonra onlar əhəmiyyətli dərəcədə zəifləyəcək.
