Süni intellekt sahəsində fəaliyyət göstərən OpenAI (ChatGPT-nin yaradıcısı) 852 milyard dollar qiymətləndirmə ilə 122 milyard dollar həcmində investisiya cəlb etdiyini açıqlayıb.
Şirkətin məlumatına görə, maliyyələşdirmə Amazon, Microsoft, Nvidia və SoftBank kimi iri texnologiya şirkətlərindən daxil olub. Həmçinin Andreessen Horowitz (a16z), Əbu-Dabidən MGX, D. E. Shaw Ventures, TPG və T. Rowe Price kimi investorlar da vəsait yatırıb. OpenAI tarixində ilk dəfə olaraq bank kanalları vasitəsilə fərdi investorlardan 3 milyard dollardan çox vəsait cəlb edib. Şirkət həmçinin Keti Vud və onun Ark Invest fondu tərəfindən idarə olunan bir neçə ETF-ə daxil ediləcəyini bildirib ki, bu da daha geniş investor kütləsinə şirkətə investisiya etmək imkanı verəcək.
Bloomberg-in məlumatına görə, Amazon 50 milyard dollar investisiya etməyə razılaşıb, Nvidia və SoftBank isə hər biri 30 milyard dollar yatırıb. Amazon investisiyanın böyük hissəsini — 35 milyard dolları — OpenAI birjaya çıxacağı (IPO) və ya ümumi süni intellekt (AGI) yaradacağı halda ödəyəcək. AGI — insan səviyyəsində idrak qabiliyyətlərinə malik və özünü öyrənə bilən süni intellektdir, lakin bu konsepsiya hələ praktikada reallaşmayıb.
Bloomberg yazır ki, bu, OpenAI tarixində ən böyük maliyyələşdirmə raundudur və digər özəl startapların investisiya raundlarını, eləcə də birləşmə və satınalma sövdələşmələrini və IPO-ları üstələyib. Bu, süni intellekt texnologiyalarına böyük marağı əks etdirir. Nəşrin məlumatına görə, bu raund Anthropic və xAI kimi digər AI startaplarının son maliyyələşdirmələrini xeyli qabaqlayır.
OpenAI-nin maliyyə direktoru Sara Frayar bildirib ki, bu maliyyələşdirmə hətta tarixdəki ən böyük IPO-ları belə kölgədə qoyur. Bloomberg-in yazdığına görə, bu sövdələşmə şirkətə, o cümlədən ABŞ-ın İranla münaqişəsi fonunda ictimai bazarlardakı qeyri-müəyyənlik şəraitində, hesablama resurslarına və AI inkişafına sərmayə qoymaqda daha çox çeviklik verəcək.
Bloomberg xatırladır ki, OpenAI-nin aylıq gəliri 2 milyard dollar təşkil edir. Şirkət bu il monetizasiyanı gücləndirərək ChatGPT-də reklam funksiyasını işə salıb və bu, altı həftə ərzində illik 100 milyon dollarlıq dövriyyəyə çatmağa imkan verib. OpenAI həmçinin məhsul portfelini optimallaşdırıb və martın sonunda realistik video yaradan Sora alətini bağlamaq qərarı verib. Bloomberg-in məlumatına görə, şirkət çat-bot, proqramlaşdırma aləti və veb-brauzeri birləşdirəcək “SuperApp” adlı kompüter tətbiqi üzərində işləyir.
OpenAI-nin baş direktoru Sem Altman (Forbes-in qlobal milyarderlər reytinqində 1247-ci yeri tutur, 1 aprel tarixinə sərvəti 3,3 milyard dollar olaraq qiymətləndirilir) daxili qeyddə bildirib ki, şirkət təhlükəsizlik üzrə bəzi komandaları yenidən təşkil edərək bu funksiyaları inkişaf prosesinə inteqrasiya etməyi və rəhbərliyin diqqətini infrastruktur və kapital cəlbi layihələrinə yönəltməyi planlaşdırır.
