OpenAI-nin ilk istehlakçı cihazının portativ “ağıllı” kolonka olacağı gözlənilir, bu barədə Bloomberg–in icmalçısı Mark Qurman bildirib.
Mənbələrin sözlərinə görə, məhsul hazırda hazırlanma mərhələsindədir və onun bazara çıxarılma tarixi hələ məlum deyil. Həmsöhbətlər cihazı ChatGPT əsasında işləyən “AI-kompanyon” kimi təsvir edirlər. Kolonkaşı “ağıllı ev” sistemlərini idarə edə, istifadəçilərin suallarını cavablandıra, həmçinin OpenAI-nin digər məhsullarının imkanlarından yararlana biləcək.
Şirkətin planına əsasən, cihaz istifadə olunduqca sahibini daha yaxşı tanıyacaq və onun ehtiyaclarını əvvəlcədən proqnozlaşdıra biləcək. Dinamikin həmçinin hərəkət edən mexaniki elementlərlə təchiz edilməsi nəzərdə tutulur ki, bu da onun “canlı” təsiri bağışlamasını təmin edəcək.
Mark Qurmanın qeyd etdiyi kimi, OpenAI-nin bu məhsulu bazara çıxarma planları Apple tərəfindən irəli sürülən kommersiya sirrinin oğurlanması ilə bağlı ittihamlar səbəbindən çətinləşə bilər. Apple 2026-cı ilin iyulunda məhkəməyə müraciət edərək iddia edib ki, OpenAI keçmiş Apple əməkdaşlarını işə qəbul edərkən onlardan hələ təqdim olunmamış cihazlar barədə məxfi məlumatlar vermələrini istəyib.
OpenAI 400-dən çox keçmiş Apple əməkdaşını işə götürüb və Coni Ayvın yaratdığı io Products startapını da satın alıb. Apple məhkəmə vasitəsilə OpenAI-nin korporativ məlumatlarının açıqlanmasına və gələcək cihazının satışına qadağa qoyulmasına nail olmağa çalışır.
OpenAI isə ittihamları rədd edir və “başqalarının sirlərində maraqlı olmadığını” bildirir. Mark Qurmanın OpenAI-dəki mənbələrinin sözlərinə görə, hazırlanmaqda olan dinamik HomePod və Apple-ın digər cihazlarından “əhəmiyyətli dərəcədə fərqlənir”.
