“Oracle” şirkətinin səhmləri Nyu-York Fond Birjasında axşam ticarəti zamanı 11% düşüb. CNBC-nin ticarət məlumatlarına istinadən yazdığına görə, buna səbəb proqram təminatı istehsalçısının rüblük hesabatının analitik gözləntilərindən zəif olmasıdır. 10 dekabr əsas ticarətin bağlanışında “Oracle” səhmlərinin qiyməti 223,01 dollar (+0,7%) təşkil edib. Şirkət hesabatında süni intellekt üçün məlumat emalı mərkəzlərinə və digər avadanlıqlara xərclərin kəskin artdığını bildirib. “Bloomberg” qeyd edir ki, bu, investorların istədiyindən daha uzun müddətdə bulud xidmətlərindən gəlirə çevrildiyini göstərir.
“Oracle”ın 2026-cı maliyyə ilinin ikinci rübü üçün gəliri illik müqayisədə 14% artaraq 16,06 milyard dollara çatıb. LSEG tərəfindən sorğulanan analitiklər orta hesabla 16,21 milyard dollar gözləyirdi, CNBC vurğulayır. Bulud xidmətlərinin satışları 34% artaraq 7,98 milyard dollara, əsas infrastruktur bölməsinin gəliri 68% artaraq 4,08 milyard dollara yüksəlib. Proqram təminatı satışlarından gəlir isə illik müqayisədə 3% azalaraq 5,88 milyard dollar təşkil edib. Bu üç göstəricinin hamısı analitik proqnozlarından aşağı olub. Səhm başına düzəldilmiş mənfəət illik müqayisədə 54% artaraq 2,26 dollara yüksəlib.
Son on il ərzində “Oracle” biznesini məlumat bazaları və korporativ proqram təminatından kənara çıxararaq bulud infrastrukturuna yönəldib və bu sahədə “Amazon”, “Microsoft” və “Google” ilə rəqabət aparır, CNBC yazır. Hazırda investorları şirkətin artan borc öhdəlikləri və tələbin zəifləməsi halında “Oracle”ın qarşılaşa biləcəyi potensial risklər narahat edir.
Noyabr ayında “Oracle” səhmləri 23% ucuzlaşıb və bu, 2021-ci ildən bəri ən pis aylıq nəticə olub, CNBC bildirir. Hazırda kotirovkalar sentyabrda qeydə alınmış rekord səviyyədən təxminən 32% aşağıdır, lakin 2025-ci ilin əvvəlindəki göstəricilərlə müqayisədə hələ də 34% yüksəliş nümayiş etdirir.
“Oracle”ın təsisçisi Larri Ellison 11 dekabr tarixinə görə “Forbes Real-Time Billionaires” qlobal reytinqində dünyanın ən varlı insanları siyahısında ikinci yerdə qərarlaşıb və yalnız İlon Maskdan geri qalır. Onun sərvəti 276,3 milyard dollar (+0,68%) olaraq qiymətləndirilir. Sentyabr ayında “Oracle” səhmlərinin 40%-dən çox bahalaşmasından sonra Ellison tarixdə sərvəti 400 milyard dollara çatan ikinci milyarder olub.
